10 мая дапаможны біскуп Гродзенскай дыяцэзіі Юзаф Станеўскі цэлебраваў святыя Імшы ў гродзенскай парафіі Найсвяцейшага Адкупіцеля (Дзевятоўка). Падчас Імшаў, адна з якіх была на польскай, а другая на беларускай мове, іерарх удзяліў Першую святую Камунію дзецям парафіі.

Святую Камунію ўпершыню прынялі ў гэты дзень каля 200 дзяцей.

Звяртаючыся да дзяцей і іх бацькоў, іерарх адзначыў, што дзеці – гэта «вясна Касцёла». Па словах біскупа, вясна заўсёды нясе надзею і радасць; і такая радасць у гэты дзень заўважалася на тварах дзяцей і бацькоў. Іерарх звярнуў увагу, што гэтая радасць «павінна ператварыцца ў евангельскі чын», а «прыклад добрага евангельскага чыну павінны даць сваім дзецям бацькі, бо гэта абавязак кожнага бацькі і маці».

Біскуп сказаў, што ў гэты дзень захацеў быць сведкам такой незвычайнай для кожнага чалавека падзеі. «Праз сённяшнюю сустрэчу я жадаю ўмацаваць сваю веру», — дадаў іерарх.

Біскуп Юзаф Станеўскі падзякаваў бацькам дзяцей, якія прыступілі да Першай Камуніі, за тое, яны жадаюць трымацца хрысціянскіх каранёў, што такім чынам хочуць працягваць традыцыю і спрыяць узрастанню Касцёла ў Беларусі.

Дзецям іерарх пажадаў, каб Хрыстус быў Госцем іх душы не толькі ў гэты памятны дзень прыняцця Яго першы раз, але і каб заўсёды ў іх сэрцах было належнае месца для Езуса Хрыста, які захацеў застацца ў Касцёле ў Эўхарыстыі.

Кс. Юрый Марціновіч,

Фота Галіны Валюшка