13 мая ў санктуарыі Маці Божай Фацімскай у Шчучыне дапаможны біскуп Мінска-Магілёўскай архідыяцэзіі Юрый Касабуцкі удзяліў сакрамэнт канфірмацыі 45 кандыдытам. Да прыняцця сакрамэнту кандыдаты рыхтаваліся на працягу двух гадоў, удзельнічаючы ў катэхезах, спецыяльных набажэнствах і рэкалекцыях напярэдадні прыняцця сакрамэнту.

Падчас святой Імшы біскуп прыгадаў пра абавязкі «дарослых хрысціянаў» — каб ганарыліся сваёй верай, каб мелі адвагу жыць паводле Хрыстовай навукі, хоць свет будзе спакушаць да больш зручных рэчаў, не маючых нічога агульнага з верай, якую вызнаюць.

Пасля Эўхарыстыі адбылося набажэнства да Маці Божай з Фацімы з нагоды чарговай гадавіны аб’яўленняў.

На заканчэнне моладзь падзякавала біскупу за атрыманы дар канфірмацыі, святарам — за тое, што дапамагалі як у духоўнай, так і фізічнай падрыхтоўцы да ўрачыстасці.

Біскуп Юрый Касабуцкі ў адказ пажадаў усім адвагі да мужнага вызнавання сваёй веры.

А. Віталій Слука SP