17 мая біскуп Гродзенскі Аляксандр Кашкевіч удзяліў сакрамэнт канфірмацыі 40 вернікам парафіі Узвышэння Святога Крыжа ў Гродне. Сакрамэнт вернікі прынялі ў асаблівы час – чакання ўрачыстасці Спаслання Духа Святога.

Сакрамэнт канфірмацыі такі ж важны, як і іншыя. Яго прымаюць у дарослым узросце, для таго, каб чалавек станавіўся сапраўдным вызнаўцам Езуса Хрыста і мог заўсёды станавіцца ў абароне веры. Пра абавязак абвяшчэння Евангелля Хрыста прыгадаў біскуп Аляксандр Кашкевіч у гаміліі.

“Мы таксама, як хрысціяне, павінны абвяшчаць Евангелле Езуса. Мы павінны дзяліцца Добрай Навіной, што Хрыстус Уваскрослы жыве і кіруе лёсамі ўсяго свету, усяго чалавецтва і кожнага чалавека паасобку. Мы павінны даваць сведчанне, што Езус Хрыстус – наша Дарога, Праўда і Жыццё, што Ён вядзе нас у дом Айца, дзе шмат пакояў, дзе падрыхтавана месца для кожнага з нас”.
 
Абвяшчэнне Хрыста сучаснаму свету, як адзначыў біскуп, патрабуе пастаяннага паглыблення сваёй веры. “Чытаючы Святое Пісанне, услухоўваючыся ў навучанне Касцёла, развіваючы асабістае малітоўнае жыццё і з верай прыступаючы да святых сакрамэнтаў, мы павінны ўсё бліжэй пазнаваць Езуса і ўсё больш Яго любіць”, - дадаў іерарх.

“Калі мы самі будзем людзьмі жывой веры, калі навучымся жыць верай кожны дзень, то будзем у стане дзяліцца ёй з самымі блізкімі: з членамі нашай сям’і, сябрамі, калегамі, з тымі, каго Бог паставіў на шляху нашага жыцця, – сказаў біскуп. – Калі мы будзем старацца жыць Евангеллем, захоўваць Божыя запаведзі, то станем для іншых святлом, якое ўмацуе іх у веры”.

У гэты радасны дзень прыняцця групай вернікаў сакрамэнту канфірмацыі біскуп пажадаў кандыдатам, каб яны ўсім сэрцам давяралі Езусу і “імкнуліся за Ім да таго, што добрае, прыгожае і ўзнёслае”.

На заканчэнне Эўхарыстыі вернікі падзякавалі біскупу, святарам, якія рыхтавалі іх да гэтага дня, і сваім родным, якіх назвалі сваімі сведкамі веры.

Кс. Юрый Марціновіч