Адбылася сустрэча катэхетаў Гродзенскай дыяцэзіі з падсумаваннем катэхетычнага года |
Беларусь - Гродзенская дыяцэзія |
19.05.2015 11:23 |
На сустрэчу прыбылі каля 50 святароў, сясцёр законных і свецкіх катэхетаў, якія штодзень служаць сярод дзяцей і моладзі, займаючыся іх навучаннем і рэлігійным выхаваннем. Сабраных прывітаў а. доктар Андрэй Шчупал CSsR – дырэктар аддзела навучання і выхавання Гродзенскай курыі. У сваім слове святар адзначыў, наколькі вялікая сёння роля катэхета, галоўным заданнем якога з’яўляецца весці чалавека да сустрэчы з Богам. Таксама ўдзельнікі выслухалі два рэфераты. Першы прадставіў а. Ян Асіповіч SP, распавёўшы ў ім аб педагогіцы св. Юзафа Каласанса. Харызмат айцоў піяраў – праца з дзецьмі і моладдзю, якія з’яўляюцца будучняй кожнага народа і Касцёла. Святар пачаў ад гісторыі жыцця святога, заснавальніка гэтай законнай супольнасці. Кажучы пра падставы яго педагогікі, дакладчык адзначыў, што гэта “служэнне падтрымцы чалавека, штурханне яго з грамадскіх нізін і вядзенне да жыцця сціплага, але годнага”. Для св. Юзафа Каласанса, як дадаў святар, “кожная адукацыйная дзейнасць мае сэнс, бо спрыяе падтрымцы чалавека і вядзе да Праўды”. Аналізуючы рысы педагогікі святога, дакладчык заўважыў, што “нельга згубіць найважнейшае – правы самога вучня”. Кажучы пра новыя элементы ў педагогіцы заснавальніка супольнасці піяраў, святар адзначыў, што “Каласанс робіць першую спробу стварэння сталай фармацыі педагогаў”.
Другі рэферат прадставіла с. Аліцыя Шадурская SSND, якая казала пра важнасць хрысціянскага выхавання ў самым малодшым узросце. Сястра заўважыла, што першыя гады дзяцінства – час асаблівы ў выхаванні, калі маленькі чалавек пачынае фарміравацца як асоба. Дакладчыца адзначыла, што хрысціянскае выхаванне адбываецца ў першую чаргу пры дапамозе катэхізацыі, калі “чалавек разумее, што ён не адзін”, што “ўсе свае справы можна аддаць у рукі Бога і праз заступніцтва Марыі і святых прасіць аб неабходных ласках”. Сястра дадала, што матывацыяй для кожнага катэхета павінна быць вера і давер Богу, якія трэба несці тым, каго Бог ставіць на шляху. “Сэрца кожнага катэхета павінна быць напоўнена малітвай”, – адзначыла дакладчыца, а таксама заўважыла, што яшчэ адна важная рэч у катэхізацыі – творчасць. Сустрэча катэхетаў завяршылася святой Імшой у гродзенскім рэктаральным касцёле Звеставання Найсвяцейшай Панне Марыі, якую ўзначаліў біскуп Гродзенскі Аляксандр Кашкевіч. Ад імя Касцёла іерарх выказаў падзяку ўсім тым, якія працуюць на полі катэхізацыі, і адзначыў, што гэта вялікая і адказная задача, якая ляжыць на кожным катэхеце. “Гэта задача, якая спрыяе змене аблічча нашага краю і фармавання чалавечых сумленняў”, – дадаў біскуп.
Гамілію прамовіў кс. Юрый Марціновіч, які, разважаючы над чытаннем Евангелля гэтага дня, дзе Хрыстус заахвочвае вучняў быць адважнымі, адзначыў: “Адвазе нам трэба вучыцца ўсё жыццё. Толькі той, хто здолее паступова вырашаць усё больш складаныя задачы, здольны да самапрысвячэння і ахвярнасці. Адвага патрабуе прымаць сапраўды цяжкія і рызыкоўныя рашэнні. Чалавек адважны мусіць здзяйсняць вялікія ўчынкі, цалкам прысвячаць сябе, спрыяць дабру, быць верным абавязкам і Евангеллю. І такім адважным можа і павiнен быць кожны з нас”. Святар дадаў, што ў штодзённым служэнні катэхета не можа не мець адвагі. Ксёндз Юрый Марціновіч звярнуў увагу, што хрысціянства, як вучыць Папа Францішак, “з’яўляецца адважным абвяшчэннем Езуса Хрыста ажно да мучаніцтва”. (JM) |
Фотарэпартаж |