Іўе: шэраг духоўных падзей для парафіяльных дзяцей |
Беларусь - Гродзенская дыяцэзія |
10.06.2015 18:15 |
Першую Камунію атрымала 77 асоб, сярод якіх было некалькі дзяцей з прыёмнай сям'і. Падрыхтоўкаю да гэтага важнага ў жыцці малодшых вернікаў сакрамэнту займалася с. Ірэна Бучынская. Пасля заканчэння т.зв. «Белага тыдню», калі дзеці, якія прынялі Першую Камунію, з панядзелка па суботу наведваюць святую Імшу, пробашч парафіі кс. Ян Гавецкі арганізаваў для іх паездку ў Тракелі.
«Каля цудадзейнага абраза Маці Божай Тракельскай дзеці дзякавалі за дар Эўхарыстыі ў іх жыцці, а я складаў падзяку за 25 гадоў маёй святарскай паслугі», — падзяліўся кс. Ян Гавецкі. З пачаткам лета ў парафіі распачаліся «Канікулы з Богам», першы тур якіх праходзіў з 1 па 7 чэрвеня. Удзельнікі хрысціянскіх канікул з Іўя ва ўзросце ад 5 да 13 гадоў штодня распачыналі свой дзень святой Імшой у 9.00. Пасля Імшы разам са старэйшай моладдзю, якая выконвала абавязкі аніматараў-памочнікаў, яны праводзілі час у трох групах. Дзейнасць першай групы была прысвечана вывучэнню Бібліі, цікавасць да якой у дзяцей прывівалася дзякуючы маляванню і лепцы з пластыліну.
Другая група займалася праглядам хрысціянскіх фільмаў, а трэцяя збірала аматараў спартыўных гульняў. У першым туры, які арганізоўваўся для дзяцей з Іўя, паўдзельнічала 89 асоб. Другі тур, які распачнецца 15 чэрвеня, будзе праводзіцца для дзяцей з навакольных вёсак. Акрамя таго, 7 чэрвеня вуліцамі Іўя, упрыгожанымі дыванамі з кветак і эўхарыстычнай сімволікай, прайшла працэсія Божага Цела. У ёй таксама сярод удзельнікаў былі як дзеці, што прынялі сёлета Першую Камунію, так і наведвальнікі «Канікул з Богам». Аксана Ючкавіч
|
Фотарэпартаж |