У межах адпустовых урачыстасцяў у санктуарыі Маці Божай Каралевы сем’яў у Тракелях падчас ранішняй Імшы 11 ліпеня неапрэзбітэры, якія ў апошнім годзе прынялі сакрамэнт святарства, дзякавалі Богу за дар паклікання. Таксама за 25 гадоў святарскага служэння дзякаваў кс. Ян Гавецкі, пробашч парафіі Свв. апосталаў Пятра і Паўла ў Іўі.

Святую Імшу ўзначаліў дапаможны біскуп Гродзенскай дыяцэзіі Юзаф Станеўскі. Іерарх заахвоціў вернікаў узнесці Богу падзяку за дар святарства, якое ўстанавіў Езус Хрыстус падчас Апошняй Вячэры.

Стала прыгожай традыцыяй тое, што святары неапрэзбітэры i юбіляры менавіта ў дыяцэзіяльным санктуарыі дзякуюць за дар паклікання і за сваё святарскае служэнне.

У гаміліі біскуп Юзаф Станеўскі адзначыў, што сёння маладому чалавеку вельмі цяжка адказаць на заклік Бога, які кліча да штодзённага служэння ў Касцёле.

Іерарх звярнуў увагу, што распазнаць голас Бога – гэта адна реч, а другая – пасля дзяліцца Богам з іншым чалавекам. “Трэба вырушыць са свайго роднага дома да іншага чалавека, які павінен стаць тваім братам і сястрой”, – дадаў біскуп.

Па словах іерарха, “важна распазнаць, прыняць і паверыць, што задача кожнага з нас – ісці і абвяшчаць”, і “гэта аснова кожнага святарскага паклікання”.

“Кожны святар вядзе ў імя Бога дыялог з чалавекам”, - падкрэсліў біскуп. Іерарх пажадаў маладым святарам, якія толькі ўваходзяць у святарства, быць дарогай, праз якую іншыя людзі змогуць прыйсці да Хрыста.

На заканчэнне Імшы новапасвячаныя святары ўдзялілі вернікам прыміцыйнае благаслаўленне і ўручылі памятныя абразікі. Таксама яны папрасілі аб няспыннай малітве ў іх інтэнцыі і ў інтэнцыі новых пакліканняў у Касцёле.

Кс. Юрый Марціновіч