З 26 ліпеня па 1 жніўня праходзілі чарговыя рэкалекцыі для міністрантаў парафіі Святой Сям’і ў Лідзе. У рэкалекцыях прынялі ўдзел 33 міністранты рознага ўзросту.

Хлопцы праводзілі час у малітоўным чуванні, разважаючы на тэму “Еднасць з Богам і паміж міністрантамі”. Рэкалекцыі праводзіў кс. Юрый Гурскі. У іх арганізацыі прынялі актыўны ўдзел семінарыст Яўген Варонік і старэйшыя міністранты.

Сэнсам сустрэчы было сумесна правесці час у супольнасці, дзе можна лепш распазнаць голас Бога, упарадкаваць свой унутраны свет, паглядзець на многія рэчы на адлегласці, адчуць смак веры і малітвы і, безумоўна, паразважаць над сваім жыццёвым пакліканнем.

Такія рэкалекцыі праводзяцца ў парафіі штогод. Шмат гадоў запар міністранты маюць ахвоту паглыбляць рэлігійныя веды і лепш пазнаваць смак літургіі. У межах сёлетніх рэкалекцый праводзіліся катэхезы, конкурсы, спартландыі і розныя гульні.

Важнае месца ў жыцці міністрантаў займае святая Імша, падчас якой кожны з іх атрымлівае найбольшы дар - самога Бога - і развівае прагненне поўнай еднасці  з Ім. Акрамя ўдзелу у святой Імшы, амаль кожны дзень хлопцы знаёміліся са святарамі дыяцэзіі, госці мелі магчымасць пабыць з міністрантамі, цэлебраваць святую Імшу і прамовіць для іх гамілію. Сапраўдным падарункам для ўдзельнікаў сустрэчы стаў нечаканы візіт біскупа Гродзенскага Аляксандра Кашкевіча, які благаславіў прысутных на плённыя рэкалекцыі.

Напрыканцы дня, падчас выстаўлення Найсвяцейшага Сакрамэнту, міністранты дзякавалі за дабро, дадзенае Богам, перапрашалі за грэшныя ўчынкі, а таксама прасілі аб благаслаўленні на наступны дзень рэкалекцый. Яны праслаўлялі Бога супольнымі спевамі, умацоўвалі сваю еднасць з Ім і паміж сабой.

Тыдзень адпачынку з Богам праляцеў вельмі хутка. Моц Божага адзінства вельмі з’яднала хлопцаў, якія зразумелі: ісціна – у служэнні Богу, які можа не толькі змяніць чалавека, але і ачысціць, умацаваць, надаць сэнс і глыбіню жыццю, дакрануцца да цябе, аздаравіць, даць надзею; Ён заклікае кожнага маладога чалавека абвяшчаць Евангелле ўжо сёння – абвяшчаць штодзённай працай, вучобай, адпачынкам, малітвай, сяброўствам, цярпімасцю.

(AG)