20 жніўня ў парафіях Узвышэння Святога Крыжа ў Галынцы і Звеставання Найсвяцейшай Панне Марыі ў Перстуні (Гродзенская дыяцэзія), пробашчам якіх з’яўляецца кс. Павел Гедройць, дзеці ўпершыню прыступілі да святой Камуніі.

Паводле слоў кс. Паўла, «важна не тое, у якім месяцы прымаюць Першую святую Камунію, але гатоўнасць дзяцей у паўнаце ўдзельнічаць у святой Імшы», і такой гатоўнасці дзеці дасягнулі ў гэты дзень — ва ўспамін св. Бэрнарда.

У Імшы ўдзельнічаў дапаможны біскуп Гродзенскай дыяцэзіі Юзаф Станеўскі, які назваў дзяцей, што прыступілі да Першай Камуніі, «кветкамі надзеі».

Іерарх дадаў, што, нягледзячы на пустыя пасля жніва палі, карацейшы дзень і адлятаючых птушак, што сведчыць аб пераменах і аб зборы працы людскіх рук, «мы бачым кветкі надзеі» парафій у Галынцы і Перстуні ў гэтых дзецях. Паводле слоў біскупа, іх радасць, белае адзенне, усмешкі, «поўныя надзеі і любові, спавітыя верай», «напаўняюць нас упэўненасцю, што Касцёл дынамічны і што Пан корміць нас хлебам у належны час».

Біскуп пажадаў дзецям і іх бацькам цаніць хлеб — сабраны ўраджай, а асабліва Хлеб Эўхарыстычны, у якім прысутны Хрыстус.

На заканчэнне біскуп асвяціў ружанцы і перадаў дзецям абразкі Святой Сям’і з Назарэта з малітвай аб благаслаўленні для сям’і, заахвоціўшы дзяцей кожны дзень разам з бацькамі маліцца за свае сем’і і ўсе сем’і Беларусі. Таксама іерарх перадаў ім абразкі св. Яна Паўла ІІ і выяву Папы Францішка.

(NS), (AG)