23 жніўня ў парафіі Найсвяцейшай Панны Марыі Вастрабрамскай Маці Міласэрнасці (Аўгустовак) у Гродне дапаможны біскуп Гродзенскай дыяцэзіі Юзаф Станеўскі асвяціў крыжы, што будуць змешчаны на новай парафіяльнай святыні, якая будуецца.

Іерарх прыбыў у парафію па запрашэнні пробашча кс. Аляксандра Шэмета, каб асвяціць крыжы і памаліцца з вернікамі.

Разважаючы ў гаміліі над чытаннем Евангелля на гэты дзень, у якім Езус пытаецца ў сваіх вучняў, ці яны хочуць адысці ад Яго, біскуп сказаў: «Гледзячы на гісторыю нашага народа, мы прыгадваем лёс нашых блізкіх, суседзяў і парафіян, якія аддалі жыццё за Бога, бліжняга, аддалі жыццё, каб жыць з Богам і ў Богу. Мы як быццам чуем вызнанне іх веры: “Пане, да каго мы пойдзем? Ты маеш словы жыцця вечнага. А мы паверылі і пазналі, што Ты Святы Божы”».

Звяртаючыся да парафіян, іерарх адзначыў: «Бачачы ваш запал і ахвярнасць у будаўніцтве парафіяльнага касцёла, цешачыся, што сярод вашых дамоў пачынае ўздымацца да неба прыгожы Божы дом, месца спаткання з Панам, разумеем, што гэтаму будынку патрэбны знак, Касцёлу і нам патрэбны знак, дзякуючы якому ўсё мае сэнс і на якім Хрыстус Пан перамог смерць і шатана, выразіў найбольш дасканала любоў да чалавека. Гэта знак, якому некаторыя будуць супраціўляцца, але без якога не была б бачна наша годнасць і наша прыналежнасць да Божай Сям’і – Крыж нашага Пана Езуса Хрыста».

Біскуп дадаў, што крыж будзе для парафіян і іх дзяцей «знакам перамогі і моцы, даверу і надзеі, знакам, якім мы пазначаны ад нараджэння да спачынку на могілках, знакам любові да Бога».

Па словах біскупа, крыж будзе «люстэркам», у якое вернікі будуць кожны дзень углядацца, «ідучы на працу, у школу, садок ці адпачываючы на пенсіі», і «толькі пад гэтым знакам можна зразумець і паверыць, пераадолець і вытрываць, захаваць вернасць і перамагчы».

«Крыж Хрыста, перадавай нашу веру і злучай сучаснасць з вечнасцю!» – сказаў іерарх.

Парафіяне падзякавалі біскупу за супольную малітву. У сваю чаргу іерарх падзякаваў пробашчу за клопат аб будаўніцтве святыні, якая вельмі патрэбна людзям, а вернікаў заахвоціў прыкласці неабходныя сілы, каб святыня на хвалу Пана заззяла сваім бляскам.

(AG)