У гэтым годзе рэкалекцыі руху «Святло-Жыццё» ІІ ступені праходзілі ў Шчучыне. Для ўдзельнікаў гэта быў асаблівы час спаткання з Богам.

Кожная ступень рэкалекцый «Аазісу» мае свой сэнс. Мэта рэкалекцый ІІ ступені — перажыванне Exodus, ці Пасхі.

Як ізраэльцяне жадалі вырвацца з-пад улады фараона і пакінуць Егіпет, так удзельнікі рэкалекцый праходзілі тым шляхам, які вядзе да хрысціянскай сталасці, а святлом, асвятляючым для іх шлях, быў Хрыстус.

Год таму некаторыя з удзельнікаў прынялі Круцыяту вызвалення чалавека – устрыманне ад алкаголю. Яны мелі час падзяліцца сведчаннем, як вытрывалі ў сваёй пастанове і якія плёны прынесла гэтая малітва. Некалькі чалавек прыняло рашэнне працягнуць Круцыяту, а некаторыя ўзялі на сябе гэтае абяцанне ўпершыню.

У праграму дня рэкалекцый уваходзілі ранішняя малітва, спеў, святая Імша, літургічная школа, біблійнае кола, разважанне над Божым словам і адарацыя. Усё гэта дазваляла сабраным з’яднацца як супольнасць. Таксама яны вучыліся яднацца з Езусам Хрыстом падчас танцаў і забаваў.

На заканчэнне рэкалекцый адбылася Агапа — значыць найвышэйшая любоў, якой адарыў Хрыстус. Гэтай любоўю ўдзельнікі дзяліліся з бліжнімі, памятаючы, што любоў, якую чалавек аддае, памнажаецца, і да гэтага заклікае Бог.

Удзельнікі рэкалекцый вельмі ўдзячныя ксяндзу Паўлу Аляскевічу і семінарысту Андрэю Скамарошку за арганізацыю гэтых духоўных практыкаванняў і суправаджэнне падчас іх, і спадзяюцца, што Слова, якое было пасеяна ў сэрцах тых, хто прымаў удзел у рэкалекцыях, будзе перамяняць іх саміх і ўвесь свет.

Антанiна Ярашэвiч

Даведка:

Рух «Святло-Жыццё» – адзін з рухаў аднаўлення Касцёла паводле вучэння Другога Ватыканскага Сабору. Ён збірае людзей рознага ўзросту і жыццёвага стану: моладзь, дзяцей, дарослых, святароў, кансэкраваных асобаў, членаў інстытутаў свецкіх вернікаў, а таксама сем’і.

Праз адпаведную для кожнай з гэтых груп фармацыю рух выхоўвае сталых хрысціян і служыць аднаўленню Касцёла праз ператварэнне парафій у супольнасці супольнасцяў. Ёсць тры этапы фармацыі ў руху «Святло-Жыццё»: евангелізацыя – катэхуменат – дыяконія.

Заснавальнікам руху з’яўляецца Слуга Божы кс. Францішак Блахніцкі, які з першых гадоў душпастырскага служэння звяртаў асаблівую ўвагу на працу ў малых групах, пачынаючы ад Аазісу Божых дзяцей да метаду 15-дзённых рэкалекцый, якія пазней сталі называцца «Аазіс жывога Касцёла». Такім чынам утварыўся гэты рух.