Жнівень 2015 года стаў вельмі важным часам у жыцці с. Гражыны Юхневіч. У сваёй роднай парафіі Святога Уладзіслава ў Суботніках с. Гражына прыняла вечныя манаскія абяцанні.

Манахіня належыць да супольнасці сясцёр Місіянерак Хрыста Валадара. Доўгі час законніцы працавалі ў суботніцкай парафіі, прымаючы актыўны ўдзел ў парафіяльным жыцці, у выхаванні дзяцей і моладзі. Менавіта праз прыклад веры і адданасці Богу, які давалі законніцы, с. Гражына змагла адчуць сваё пакліканне.

 

 

Звычайна сёстры з гэтай супольнасці складаюць вечныя манаскія абяцанні ў генеральным доме супольнасці ў Польшчы. Але с. Гражына хацела падзяліцца сваёй радасцю з тымі людзьмі, хто праз увесь час манаскай фармацыі памятаў пра яе ў малітве, таму ўрачыстасць адбылася ў яе роднай парафіі. 

Падчас святой Імшы манахіня ляжала ніцма, сведчачы аб пакорнасці перад Панам. Вечныя манаскія абяцанні с. Гражына прыняла з рук сястры генеральнай вікарыі Яніны Кошык, якая адмыслова прыехала з Польшчы. Сястра Яніна падзякавала Богу за дар паклікання ў супольнасць с. Гражыны, а таксама асаблівым чынам падзякавала бацькам, якія на працягу ўсёй дарогі да гэтага святочнага дня падтрымлівалі дачку.

 

 

Галоўным цэлебрантам святой Імшы быў кс. Андрэй Роўба, дэкан Лідскага дэканата. Канцэлебравалі Імшу пробашч парафіі ў Суботніках кс. Аляксандр Лебядзевіч і рэктар Вышэйшай духоўнай семінарыі ў Познані (Польшча) кс. Андрэй Лысы.

 

 

Сёстры з супольнасці Місіянерак Хрыста Валадара, а таксама родныя, знаёмыя і ўсе, хто маліўся за манахіню, разам з с. Гражынай перажывалі гэты святочны дзень. Можна было заўважыць на тварах прысутных і слёзы радасці, асабліва ў пажылых парафіян, якія памятаюць часы, калі парафія не мела святара і законніц; слёзы захаплення і радасці за тое, што Бог пасылае пакліканні і ў суботніцкую парафію.

 

 

Парафіяне жадаюць с. Гражыне на дарозе яе паклікання Божага благаслаўлення і апекі Маці Божай, жадаюць, каб добры Бог вёў яе тымі шляхамі, дзе людзі найбольш патрабуюць Хрыста.