29 верасня, свята свв. арханёлаў Міхала, Габрыэля і Рафала — выключны дзень для супольнасці Вышэйшай духоўнай семінарыі ў Гродне, таму што святы арханёл Міхал з’яўляецца нябесным заступнікам Alma Mater. Таму раніцай гэтага дня ў семінарыі адбылася святая Імша з удзелам дапаможнага біскупа Гродзенскай дыяцэзіі Юзафа Станеўскага і шматлікіх гасцей.

Падчас Эўхарыстыі была асвечана і размешчана ў алтары фігурка святога арханёла Міхала са знакамітага месца Монтэ Сант-Анджэла, якое семінарыйная супольнасць змагла наведаць у гэтым годзе.

«Усёй семінарыйнай сям’ёй звяртаемся да цябе, наш ахоўнік, каб натхніў нас быць сучаснымі Міхаламі, каб мы мужна баранілі веру і дапамагалі іншым перамагаць зло, каб не сумняваліся ў Божай дабрыні і Яго ласцы, каб заўсёды ўслед за арханёлам паўтаралі словы “Хто ж як Бог” і каб сваім жыццём пастаянна пацвярджалі праўду, што вышэй за Бога няма нікога і нічога», — з гэтай просьбай семінарыйная супольнасць звяртаецца да нябеснага апекуна семінарыі.

Таксама ў гэты дзень семінарыйная супольнасць святкавала імяніны кс. Міхала Ластоўскага, выкладчыка гэтай навучальнай установы, кусташа дыяцэзіяльнага санктуарыя Маці Божай Яснагорскай у Капцёўцы. Супольнасць ад шчырага сэрца павіншавала яго з нагоды імянін, жадаючы ўсіх Божых ласкаў, здароўя, сіл, радасці, добразычлівых людзей, аптымізму, душэўнага супакою, цярплівасці, а таксама пажадаўшы, каб яго заступнік святы Міхал абараняў у розных жыццёвых сітуацыях, заўсёды быў побач  і дапамагаў у душпастырскай працы і служэнні людзям.

(AG)