Касцёл у сваім навучанні прадугледзіў дні, калі прапануе вернікам вызваліцца ад празмерных знешніх клопатаў і прывязанасці да зямных справаў, каб цалкам акунуцца ў атмасферу малітвы, цішыні і засяроджанасці. Для будучых святароў гэта асаблівы час ласкі, які дапамагае глыбей пазнаць саміх сябе, аднавіць сувязь з Хрыстом і адкрыцца на Яго любоў.

Духоўным кіраўніком чарговага “дня засяроджанасці” для навучэнцаў Вышэйшай духоўнай семінарыі ў Гродне стаў кс. Віталій Дабраловіч, дырэктар дабрачыннага каталіцкага таварыства “Caritas”. Падчас канферэнцый святар спрабаваў скіраваць думкі i ўвагу семінарыстаў на тых, хто знаходзіцца ў найбольшай патрэбе, і задумацца над тым, як можна ім дапамагчы.

Таксама святар падкрэсліў, што любоў да бліжняга, якая грунтуецца на любові да Бога, з’яўляецца абавязкам і неад’емнай часткай жыцця кожнага веруючага і ўсёй касцёльнай супольнасці.

Час духоўных разважанняў стаў для семінарыйнай сям’і чарговай прыступкай да ўнутраных зменаў, духоўнага развіцця і ўзрастання ў любові да Бога і бліжняга. Таму семінарыйная супольнасць шчыра ўдзячная кс. Віталію Дабраловічу за тое, што нагадаў удзельнікам духоўных практыкаванняў, чым з’яўляецца сапраўдная любоў і адкуль яна бярэ сваю моц, якая заўсёды аднаўляецца.  

(AG)