22 кастрычніка ў межах візітацыі Астравецкага дэканату біскуп Гродзенскі Аляксандр Кашкевіч наведаў Астравецкі цэнтральны раённы шпіталь, Астравецкі РАУС і гімназію №1.

У Астравецкім раённым шпіталі біскуп сустрэўся з медперсаналам, а таксама з часткай хворых. Звяртаючыся да працаўнікоў службы аховы здароўя, іерарх падзякаваў ім за адданае служэнне сярод тых, хто мае патрэбу ў медыцынскай апецы, і заахвоціў не стамляцца служыць людзям кожны дзень далей.

У той жа дзень біскуп наведаў Астравецкі РАУС, дзе сустрэўся з працаўнікамі міліцыі. Сустрэча прайшла ў вельмі цёплай атмасферы. Звяртаючыся да міліцыянераў, гродзенскі ардынарый адзначыў, што гэта яны забяспечваюць парадак на вуліцах нашых гарадоў і ўносяць пачуццё міру і бяспекі ў многія дамы. Ад імя тысяч людзей, якія сустракаюцца з прыхільнай дапамогай міліцыі, біскуп падзякаваў міліцыянерам за іх чуласць да чалавечай крыўды і дапамогу, якую яны аказваюць. Іерарх пажадаў, каб Бог дзейнічаў разам з імі ва ўсім, што яны робяць для дабра нашай краіны і бяспекі яе жыхароў.

Затым біскуп наведаў гімназію №1 г. Астраўца, дзе сустрэўся з настаўнікамі. Падчас сустрэчы іерарх падзякаваў ім за працу выхавання новых пакаленняў. Кажучы аб ролі педагога сёння, гродзенскі ардынарый адзначыў, што гэта адказная задача – перадаваць веды і выхоўваць давераных ім дзяцей і моладзь. Іерарх назваў гэта цяжкім і важным выклікам, таму што ў настаўніку сёння маюць патрэбу дзеці і моладзь, якія шукаюць узораў, зыходных пунктаў.

Карыстаючыся нагодай, пробашч парафіі Свв. Космы і Дам’яна ў Астраўцы кс. Юзаф Багдзевіч пры сустрэчы з працаўнікамі службы аховы здароўя, міліцыянерамі і настаўнікамі падзякаваў ім за плённае супрацоўніцтва і цёплыя адносіны, якія існуюць паміж Касцёлам і гэтымі арганізацыямі.

На заканчэнне дня біскуп Аляксандр Кашкевіч наведаў парафію Апекі Найсвяцейшай Панны Марыі ў Дайлідках, дзе ўзначаліў святую Імшу.

Кс. Юрый Марціновіч