25 кастрычніка, у апошні дзень кананічнай візітацыі Астравецкага дэканату Гродзенскай дыяцэзіі, біскуп Гродзенскі Аляксандр Кашкевіч наведаў парафію Свв. Космы і Дам’яна ў Астраўцы. Гэта быў выключны дзень для парафіяльнай супольнасці, якая ўрачыста і з вялікай радасцю вітала свайго пастыра.

Гродзенскі ардынарый цэлебраваў у парафіі святыя Імшы, падчас якіх заахвоціў вернікаў поўнасцю даверыцца Богу і жыць паводле прынцыпаў Евангелля. Таксама іерарх падзякаваў усім парафіянам за трыванне ў веры сваіх бацькоў і заклікаў далей заставацца з Хрыстом і Яго Касцёлам.

Біскуп заахвоціў дзякаваць Пану за Божы Касцёл, у якім кожны чалавек знаходзіць для сябе месца. Акрамя таго, гродзенскі ардынарый выказаў падзяку святарам, якія служаць у гэтай парафіі, і вернікам за іх клопат аб матэрыяльным касцёле – сваёй святыні, якая адноўленая і прыгожая.

Таксама біскуп сустрэўся з парафіяльным камітэтам і касцёльнымі супрацоўнікамі. Шматлікім дзецям іерарх удзяліў пастырскае благаслаўленне. Пасля абеду гродзенскі ардынарый наведаў законны дом Кангрэгацыі Сясцёр Служак Езуса ў Эўхарыстыі (эўхарыстак) і сустрэўся з бацькамі святароў і сясцёр законных, якія паходзяць з гэтай парафіяльнай супольнасці. Бацькам іерарх падзякаваў за стварэнне ў іх дамах атмасферы, якая спрыяла таму, каб іх дзеці пайшлі за голасам Хрыста і сёння абвяшчаюць Евангелле ў розных частках нашай краіны і за мяжой. Іерарх заахвоціў бацькоў падтрымліваць малітвай сваіх дзяцей і тыя справы, якія яны прыгожа здзяйсняюць у душпастырстве.

Таксама біскуп памаліўся разам з вернікамі за спачылых святароў, якія служылі ў астравецкай парафіі.

Кс. Юрый Марціновіч