24 кастрычніка араторый імя блл. мучанікаў з Познані ў Дзятлаве адзначыў першы дзень нараджэння. У святкаванні прынялі ўдзел дапаможны біскуп Мінска-Магілёўскай архідыяцэзіі Аляксандр Яшэўскі SDB, Рэгіянальны настаяцель Рэлігійнай каталіцкай місіі «Таварыства св. Францішка Сальскага» кс. Віктар Гайдукевіч SDB, салезіяне, сёстры салезіянкі, святары і прадстаўнікі араторыяў са Смаргоні, Бараўлян і Мінска.

Урачыстасць пачалася Эўхарыстыяй, якую ўзначаліў біскуп Аляксандр Яшэўскі. Іерарх звярнуў увагу на важнасць стварэння такога асяроддзя для дзяцей і моладзі, якое дазволіла б выхаваць сапраўдных хрысціян і сумленных грамадзян нашай Бацькаўшчыны, адзначыўшы, што менавіта такім асяроддзем з’яўляецца араторый. «Салезіянскі араторый — гэта гасцінны дом, у якім ты заўсёды знойдзеш сям’ю; гэта парафія, у якой табе дапамогуць спаткацца з жывым Хрыстом; гэта школа, якая рыхтуе да жыцця; і ўрэшце, гэта пляцоўка, дзе сябры могуць сустракацца і весела праводзіць час», — сказаў біскуп.

Іерарх дадаў, што велізарную ролю ў духоўным выхаванні дзяцей адыгрывае сям’я (маці, бацька, бабуля, дзядуля), таму менавіта ад таго, наколькі бацькі будуць удзельнічаць у выхаванні дзяцей, залежыць будучыня.

Пасля святой Імшы прысутныя былі запрошаны ў араторый на святочную праграму пад дэвізам «Мы — адна сям’я!», дзе ім былі прапанаваны гульні, конкурсы і спевы. Актыўнымі ўдзельнікамі праграмы сталі не толькі дзеці і моладзь, але і святары. Яшчэ адну старонку гісторыі існавання араторыя адкрыла «Гасцявая кніга араторыя», у якой усе жадаючыя змаглі пакінуць свае думкі і ўражанні.

На завяршэнне біскуп Аляксандр Яшэўскі звярнуўся да ўдзельнікаў урачыстасці са словам і ўдзяліў пастырскае благаслаўленне. Затым быў салодкі стол, сяброўскія гутаркі і бансы.

Паводле www.sdb.by

(AG)

Фота www.sdb.by