29 кастрычніка ў парафіі Святой Сям’і ў Лідзе адбыўся дзень засяроджання для міністрантаў. Ён прайшоў у час школьных канікул і стаў для ўдзельнікаў выдатнай магчымасцю наблізіцца да Бога і карысна правесці час для духоўнага развіцця.

Хлопцы з Ліды праводзілі гэты сонечны дзень з малітвай, вясёлым настроем і разнастайнымі мерапрыемствамі, арганізаванымі кс. Юрыем Гурскім.

Дэвізам дня засяроджання былі словы «Мужнасць у нашых сэрцах». На катэхезе, якую праводзіў кс. Руслан Мазан, абмяркоўвалася шмат цікавых актуальных пытанняў, у тым ліку: «Якім бачыць мужчыну хрысціянства?», «Якія якасці павінны быць у сапраўднага мужчыны?», «Хто такі смелы чалавек?», «У якіх выпадках моцны пол можа ўжываць сваю фізічную сілу супраць іншых людзей?».

Важна было данесці да хлопцаў, што для хрысціянства мужчына — гэта чалавек адказнасці і адначасова ахвярнасці,  сапраўднае разуменне гэтых аспектаў змяшчаецца ў прыкладзе Езуса Хрыста, Бога і Чалавека, які бярэ адказнасць за ўсё чалавецтва на сябе і менавіта таму Яго называюць Збаўцам.

Акрамя малітвы, хлопцаў чакала мноства цікавых конкурсаў, спартыўных спаборніцтваў, гульні ў тэніс і футбол, маляванне. Віктарына па ведах літургічнай службы, якую праводзілі старэйшыя міністранты парафіі, зацікавіла ўдзельнікаў займальнымі і складанымі пытаннямі. Яны паказалі выдатныя веды аб святой Імшы і гісторыі Касцёла, сталі дружнай і адказнай камандай.

Час праляцеў для ўдзельнікаў вельмі хутка, было відаць, што гэты дзень для іх быў асаблівым, прынёс ім мноства станоўчых эмоцый, новыя веды і, самае галоўнае, магчымасць быць побач з Богам і праслаўляць Яго ў сваім жыцці.

Вікторыя Бурч, (AG)