Пачынаючы ад урачыстасці Усіх Святых, дапаможны біскуп Гродзенскай дыяцэзіі Юзаф Станеўскі на працягу актавы ўрачыстасці Усіх Святых наведаў розныя парафіі і разам з вернікамі памаліўся за спачылых.

Таксама іерарх заахвоціў вернікаў да малітвы аб памерлых святарах, якія вучылі любіць Бога і людзей і ўдзялялі сакрамэнты.

У гаміліях біскуп падкрэсліў важнасць першых дзён лістапада, якія для католікаў з’яўляюцца днямі асаблівай дапамогі чысцовым душам і часам асаблівай малітвы, каб памерлыя мелі ўдзел у Хрыстовай перамозе над смерцю.

Іерарх адзначыў, што малітва мае такую моц, што ў стане адчыніць брамы неба.

1 лістапада, ва ўрачыстасць Усіх Святых, біскуп Юзаф Станеўскі наведаў парафію Нараджэння Найсвяцейшай Панны Марыі ў Зарачанцы (Баля Касцёльная). Падчас Імшы іерарх прыгадаў вернікам жыццёвы шлях святых і благаслаўлёных беларускай зямлі, адзначыўшы, што беларускі народ мае права і адпаведныя магчымасці, каб быць святым.

2 лістапада, ва ўспамін усіх памерлых вернікаў, біскуп наведаў сваю родную парафію Найсвяцейшага Сэрца Пана Езуса i св. Язафата ў Заневічах, дзе маліўся за сваіх спачылых продкаў. Таксама іерарх у малітве дзякаваў Богу за жыццё і веру.

3 лістапада біскуп наведаў могілкі ў Гожы, дзе маліўся за свайго аднакурсніка кс. Антонія Самілу, які быў пробашчам у парафіі ў Гожы і адышоў у вечнасць у 2002 г.

4 лістапада, у дыяцэзіяльны дзень малітваў за памерлых святароў Гродзенскай дыяцэзіі, іерарх наведаў парафію Імя Найсвяцейшай Панны Марыі i св. Яна Непамука ў Вялікіх Эйсмантах, дзе маліўся за спачылых гэтай парафіяльнай супольнасці, асабліва за святароў, з якімі пазнаёміўся ў сваім жыцці: кс. Юзафа Мацееўскага, які ўдзяліў будучаму біскупу сакрамэнт хросту, і кс. Станіслава Сароку. Біскуп назваў гэтых святароў “сведкамі Евангелля”, таму што між іншым дзякуючы ім змог рабіць крокі наперад у веры.

5 лістапада іерарх узначаліў святую Імшу ў парафіі Беззаганнага Зачацця Найсвяцейшай Панны Марыі ў Квасоўцы, дзе маліўся за памерлага ў гэтым годзе кс. Яна Занеўскага, які стаў узорам таго, як адважна пайсці за голасам Хрыста, і паходзіць з той жа мясцовасці, што і біскуп Юзаф Станеўскі.

6 лістапада ў капліцы Вышэйшай духоўнай семінарыі ў Гродне іерарх маліўся разам з усёй семінарыйнай супольнасцю за спачылых выкладчыкаў, навучэнцаў, выпускнікоў, свецкіх супрацоўнікаў і ахвярадаўцаў гэтай навучальнай установы, якія былі звязаны з ёй на працягу 25 гадоў яе існавання.

Вечарам 6 лістапада біскуп наведаў парафію Св. Яна Хрысціцеля ў Беняконях, дзе маліўся за памерлых святароў, ахвярадаўцаў і будаўнікоў святыні.

7 лістапада іерарх разам з вернікамі парафіі Узвышэння Святога Крыжа ў Лідзе маліўся за памерлых з іх сем’яў і за памерлых святароў, якія служылі ў гэтай парафіі. Біскуп падзякаваў вернікам за малітоўную памяць аб спачылых святарах і клопат аб магіле а. Станіслава Каласантыя Роека SP, які адышоў у вечнасць у 1996 г. і пахаваны каля лідскага касцёла.

Таксама ў гэты дзень падчас святой Імшы маліліся за 9 святароў, забітых гітлераўцамі каля Ліды ў часы Другой сусветнай вайны.

8 лістапада біскуп наведаў парафію Божай Міласэрнасці ў Лідзе. Іерарх падзякаваў вернікам за тое, што яны ў штодзённых малітвах за памерлых памятаюць аб спачылых святарах, і заахвоціў не забываць на працягу ўсяго года аб абавязку малітвы за памерлых.

Кс. Юрый Марціновіч