8 лістапада ў гродзенскай парафіі Беззаганнага Зачацця Найсвяцейшай Панны Марыі прайшоў ужо традыцыйны парафіяльны Дзень «Карытас». Мэтай мерапрыемства было азнаёміць парафіян з дзейнасцю Дабрачыннага каталіцкага таварыства «Карытас» у Гродзенскай дыяцэзіі і Беларусі ў цэлым.

Вернікі з вялікім задавальненнем падтрымалі гэтую акцыю. Дырэктар «Карытас-Гродна» ксёндз Віталій Дабраловіч заклікаў усіх прысутных на святой Імшы падтрымаць дабрачынныя праекты як фінансава, так і духоўна, праз індывідуальную малітву. Другі від дапамогі святар адзначыў перш за ўсё.

Святар звярнуў увагу, што трэба ўмець дзяліцца тым, што чалавек мае, і не праходзіць абыякава каля тых, хто знаходзіцца ў патрэбе.

Акцыя прыгадала людзям, якія ў гэты дзень наведалі гродзенскую святыню, што ў глыбіні чалавечага сэрца заўсёды жыве жаданне дапамогі іншаму, і гэтая дапамога можа быць часам вельмі простай, не патрабуе надзвычайных учынкаў, якімі можна было б хваліцца.

Кожны чалавек створаны для таго, каб быць для іншага чалавека, а не замыкацца ў сабе, а аказаная дапамога можа быць крыніцай сапраўднай радасці. Праз акцыю да вернікаў даносілася думка, што дзякуючы дапамозе сэрца чалавека пастаянна пашыраецца, становіцца падобным да сэрца Езуса, поўнага дабрыні і любові.

У парафіян была магчымасць наглядна ўбачыць дзейнасць «Карытас-Гродна» ў кожным праекце праз мабільную фотавыставу.

Калектыў «Карытас-Гродна» ўдзячны ўсім парафіянам, якія прынялі ўдзел у мерапрыемстве, а таксама пробашчу парафіі кс. Аляксандру Раманоўскаму і валанцёрам, якія дапамаглі ў падрыхтоўцы і правядзенні Дня «Карытас».

Алег Гарбачоў, фота аўтара

(AG)