Услед за моладдзю Гродна мініяцюры духоўных сімвалаў Сусветнага дня моладзі — крыжа і абраза Маці Божай Salus Populi Romani — прыняла моладзь Ліды. 14 лістапада ў лідскай парафіі Узвышэння Святога Крыжа адбылася святая Імша за моладзь Гродзенскай дыяцэзіі і ўсёй Беларусі.

Эўхарыстыю ўзначаліў дапаможны біскуп Гродзенскай дыяцэзіі Юзаф Станеўскі, адказны па справах моладзі пры Канферэнцыі Каталіцкіх Біскупаў у Беларусі.

Падчас Імшы моладзь малілася за ахвяр апошніх трагічных падзей у Егіпце і Парыжы. З заклікам да ўдзелу ў Сусветным дні моладзі, які адбудзецца ў 2016 г. у Кракаве (Польшча), і з гаміліяй звярнуўся да прысутных кс. Антоні Грэмза, каардынатар СДМ у Беларусі, які пасля Імшы нагадаў таксама ўмовы ўдзелу ў СДМ.

Агульнаму ажыўленню сабраных паслужыла сумеснае выкананне гімна СДМ у Кракаве. Словы гімна і ўзнёслы настрой спадарожнічалі ўсёй сустрэчы.

Такім чынам моладзь Ліды пачала афіцыйную падрыхтоўку да СДМ, перадаючы мініяцюры яго сімвалаў у асобныя парафіі, каб больш з'яднацца духоўна з моладдзю ўсяго свету перад сустрэчай з Папам Францішкам у Кракаве.

Наступным месцам перадачы сімвалаў стане 21 лістапада Шчучын.

Моладзь Гродна пачала падрыхтоўку да СДМ 17 кастрычніка. Тады ў гродзенскім касцёле Звеставання Найсвяцейшай Панне Марыі адбылoся асвячэнне мініяцюр духоўных сімвалаў Сусветнага дня моладзі і ўручэнне іх дэлегацыям парафій горада.

(JM)