21 лістапада маладыя католікі Шчучына афіцыйна пачалі падрыхтоўку да ўдзелу ў Сусветным дні моладзі, які пройдзе ў ліпені 2016 г. у Кракавe.

У гэты дзень душпастыр моладзі Гродзенскай дыяцэзіі і каардынатар СДМ у Беларусі кс. Антоні Грэмза перадаў моладзі шчучынскай парафіі мініяцюры духоўных сімвалаў Сусветнага дня моладзі — крыжа і абраза Маці Божай Salus Populi Romani.

Мясцовая моладзь і студэнты ВНУ з розных куткоў Беларусі, якія паходзяць са шчучынскай парафіі Св. Тэрэзы, сабраліся разам, каб прыняць эстафету духоўнай еднасці з маладымі людзьмі Беларусі і ўсяго свету ў падрыхтоўцы да СДМ у Кракаве.

Старэйшая моладзь парафіі на чале з а. Вітальдам Пяцельчыцам SP прымала ўдзел у СДМ у Мадрыдзе (Іспанія) у 2011 г. Будучы СДМ у Кракаве стане для многіх маладых людзей са Шчучына першым у іх жыцці.

Святую Імшу для моладзі ўзначаліў а. Віталій Слука SP. Ксёндз Антоні Грэмза, каардынатар СДМ у Беларусі, прамовіў гамілію, падзяліўшыся сваім асабістым досведам удзелу ў СДМ і заклікаўшы прыняць запрашэнне да ўдзелу ў сусветным форуме ў Кракаве. Было адзначана, што, насуперак усім перашкодам, СДМ варты таго, каб ахвяравацца і быць разам з Папам Францішкам і моладдзю ўсяго свету, і што кожны малады чалавек, які шукае маладосці і паўсюднасці Касцёла, знойдзе іх падчас гэтага мерапрыемства.

Шчучын стаў ужо трэцім горадам у Гродзенскай дыяцэзіі, які прымае мініяцюры духоўных сімвалаў СДМ. Першымі пачалі падрыхтоўку да сусветнага форуму маладыя людзі Гродна 17 кастрычніка. Тады ў гродзенскім касцёле Звеставання Найсвяцейшай Панне Марыі адбылoся асвячэнне мініяцюр духоўных сімвалаў Сусветнага дня моладзі і ўручэнне іх дэлегацыям парафій горада.

Моладзь Ліды пачала падрыхоўку да СДМ 14 лістапада, калі ў парафіі Узвышэння Святога Крыжа адбылася святая Імша за моладзь Гродзенскай дыяцэзіі і ўсёй Беларусі.

Кс. Юрый Марціновіч