29 лістапада, у Першую нядзелю Адвэнту, дзеці парафіі Святога Мікалая ў Геранёнах (Гродзенская дыяцэзія) падрыхтавалі невялікую сцэнку пад назвай «Самы лепшы падарунак на Божае Нараджэнне».

Удзельнікі сцэнкі паказалі, як рыхтуюцца да святаў Божага Нараджэння. Для самых родных і блізкіх дзеці запакоўвалі падарункі. Хтосьці вырашыў падараваць кубачак для мамы, а тату – набор інструментаў, для малодшых сясцёр – ляльку і дыск з рэлігійнымі мульфільмамі, а хтосьці – лічбавы фотаапарат, аб якім даўно марыў старэйшы брат.

На працягу ўсёй пастаноўкі паміж дзецьмі вёўся дыялог, дзе яны разважалі, якім павінен быць падарунак для лепшага сябра.

Адна дзяўчынка здзівіла сваіх сяброў: яна падрыхтавала вялікую каробку, якая прыцягнула ўвагу ўсіх. З далейшай размовы высветлілася, што гэта падарунак для самага лепшага сябра – Езуса. «А што ж ты Яму сабралася падараваць?» – спыталі ў дзяўчынкі. «Я вырашыла падараваць Яму саму сябе!» – з задавальненнем і вялікай радасцю сказала яна ў адказ сябрам.

Анастасія Мішкура, (AG)