У Другую нядзелю Адвэнту, 6 снежня, у парафіі Святога Мікалая, біскупа, у Геранёнах (Гродзенская дыяцэзія) адбылася адпустовая ўрачыстасць. Гэты дзень быў у парафіі вельмі насычаным.

У вёсцы Сураж, якая належыць да геранёнскай парафіі, дзеці прадставілі сцэнку “Самы лепшы падарунак на Божае Нараджэнне”, якая ў чарговы раз прымусіла гледачоў задумацца над падрыхтоўкай свайго сэрца да Нараджэння Езуса Хрыста.

Цэнтральнай кропкай парафіяльнай урачыстасці стала Эўхарыстыя, якую ўзначаліў пробашч парафіі кс. Дзмітрый Несцер. З гаміліяй да вернікаў звярнуўся айцец Вітальд Жэльветра, пробашч суседняй парафіі Святога Казіміра ў Ліпнішках.

Айцей Вітальд узгадаў гісторыю жыцця святога Мікалая, адзначыўшы дзве яго важныя цноты: верy і любоў. Святар заклікаў парафіян, каб яны, беручы прыклад са святога, за час Адвэнту маглі адказна і добра падрыхтавацца да святаў Божага Нараджэння.

Прыемным момантам у гэты дзень стала для вернікаў прысутнасць святога Мікалая на Імшы. Дзеці атрымалі ад яго салодкія падарункі.

Завяршэннем парафіяльнай урачыстасці стаў невялікі канцэрт музычнага гурта з парафіі Беззаганнага Зачацця Найсвяцейшай Панны Марыі ў Лідзе.

Анастасія Мішкура, (AG)