7 снежня ў капліцы Вышэйшай духоўнай семінарыі ў Гродне прайшла прыміцыйная святая Імша новапрэзбітэра Алега Яновіча.

Святар атрымаў прэзбітэрскае пасвячэнне ў гродзенскай катэдры з рук біскупа Гродзенскага Аляксандра Кашкевіча 21 лістапада.

Ксёндз Алег Яновіч наведаў семінарыйную супольнасць, каб падзякаваць усім тым, хто дапамагаў яму на шляху да святарства. У той жа дзень святар узначаліў святую Імшу ў інтэнцыі ўсіх асобаў, якіх сустрэў падчас фармацыі, а таксама ў інтэнцыі семінарыі і выкладчыкаў, каб з Божай дапамогай яны працягвалі далейшую працу ў падрыхтоўцы да Божай службы новых святароў.

Рэктар семінарыі кс. д-р Раман Рачко ад імя ўсёй семінарыйнай супольнасці пажадаў новапрэзбітэру, каб яго штодзённае служэнне, якое распачынае святар, прыносіла плён і выконвалася з вялікім адданнем Пану Богу, Касцёлу і людзям, да якіх будзе пасланы.

Ксёндз Алег Яновіч удзяліў усім прысутным прыміцыйнае благаслаўленне i папрасіў аб малітоўнай падтрымцы ў святарскім служэнні.

Кс. Юрый Марціновіч