Ужо на працягу некалькіх гадоў Вышэйшую духоўную семінарыю ў Гродне наведваюць дзеці з радунскага дома-інтэрната. Гэты год не стаў выключэннем.

Семінарыйная супольнасць апякуецца выхаванцамі інтэрната і заўсёды сустракае доўгачаканых гасцей з вялікай радасцю і пашанай, як вельмі блізкіх і дарагіх сэрцу людзей.

Падчас сёлетняй сустрэчы семінарысты спрабавалі стварыць неабходныя ўмовы для таго, каб дзеці адчулі бязмежную любоў і цеплыню бацькоўскага дома, пранікліся радасцю светлага свята Нараджэння Хрыста, зразумелі, што, нягледзячы на ўсе жыццёвыя абставіны, трэба заўсёды заставацца добрымі, міласэрнымі і за ўсё дзякаваць Богу.

Навучэнцы семінарыі спадзяюцца, што атмасфера, насычаная яркімі эмоцыямі і ўражаннямі, пакіне ў душы кожнага з прысутных незабыўны след, дапаможа зразумець міласэрнасць, любоў, бескарыслівасць у чалавечых узаемаадносінах і стане духоўнай падтрымкай у далейшым жыцці.

Яўген Амасёнак, (AG)