Ужо на працягу многіх гадоў навучэнцы Вышэйшай духоўнай семінарыі ў Гродне наведваюць дзіцячыя прытулкі і дамы Гродзенскага раёна. 16 снежня яны сустрэліся з дзецьмі-інвалідамі з дома-інтэрната ў вёсцы Галавічполле.

Пераважная большасць насельнікаў гэтага дома-інтэрната — сіроты або дзеці, ад якіх адмовіліся бацькі.

Падчас сустрэчы семінарысты на чале з прэфектам кс. Андрэем Лішко спрабавалі адарыць дзяцей любоўю і радасцю надыходзячага свята, правялі катэхезу пра Божае Нараджэнне. Потым усе разам падзяліліся аплаткай і спявалі калядныя песні.

У якасці падзякі за шчырыя, напоўненыя любоўю і клопатам адносіны семінарыстаў да дзяцей выхаванцы інтэрната падрыхтавалі для гасцей канцэрт, які падарыў радасць і ўзнёслы настрой усім гледачам.

Яўген Амасёнак