27 снежня, у нядзелю Святой Сям’і, дзеці і моладзь парафіі ў Сапоцкіне (Гродзенская дыяцэзія) прадставілі містэрыю на тэму Божага Нараджэння. Містэрыя пад назвай «Як гэта было з нараджэннем Пана Езуса» была прапанавана увазе гледачоў у мясцовым Доме культуры.

Мэта святаў Божага Нараджэння – найперш сабраць каля супольнага стала ўсіх членаў сям’і, каб разам дзякаваць Богу Айцу за тое, што паслаў на зямлю свайго Сына Езуса Хрыста, які стаў адным з людзей, і каб цешыцца прабываннем разам. Парафіяльная супольнасць у Сапоцкіне дзялілася радасцю падчас сёлетняга прадстаўлення, якое па традыцыі рыхтавалі дзеці і моладзь.

Праўду аб тым, што Езус Хрыстус прыйшоў на зямлю і захацеў стаць адным з людзей, варта пастаянна прыгадваць, што і рабілі ў сапоцкінскай парафіі. У містэрыі падкрэслівалася, што Езус, прыйшоўшы на зямлю ў чалавечым целе, прынёс усім людзям збаўленне.

Выканаўцы паказалі, што Езуса Хрыста можна спаткаць таксама ў штодзённасці жыцця – у прыродзе, у бліжніх, у розных падзеях, – і заахвоцілі, каб сучасны чалавек быў адкрыты на ўсё, што прыходзіць.

Кожная такая святочная містэрыя нясе важнае для сучаснага чалавека пасланне. Дзеці і моладзь падчас прадстаўлення заахвоцілі ўсіх прысутных па прыкладзе пастухоў і вучоных магаў аддаць паклон Божаму Сыну, які прыйшоў у свет для кожнага асобна. «Хрыстус прыйшоў, каб за кожнага з нас аддаць сваё жыццё і адкрыць нам неба», – звярталі ўвагу маладыя артысты.

Кс. Юрый Марціновіч