Ужо ў сёмы раз сёстры назарэтанкі з Навагрудка запрашаюць сем’і Асацыяцыі Святой Сям’і ў свой кляштар, каб сустрэць Новы год у малітвах. Гэты Новы год разам з мясцовымі сем’ямі ў Навагрудку сустракалі сем’і з Гродна і Смаргоні.

Распачалося святкаванне святой Імшой, якую служыў кс. Міхаіл Бубен. Пасля Імшы сем’і падзякавалі ў малітвах Богу за мінулы год і папрасілі Яго благаслаўлення на наступны год.

«Мы вельмі ўдзячныя Богу за магчымасць сустракацца, дзяліцца радасцю і любоўю, маліцца разам за сем’і ўсяго свету, а асабліва за беларускія сем’і», — падзяліліся ўражаннямі сёстры назарэтанкі.

Вялікай радасцю для дзяцей і дарослых стала карнавальная ноч.

Ксёндз Віталій Сідоркін і ксёндз Віталій Цыбульскі парадавалі сем’і і манахінь цікавымі канферэнцыямі. Не абыйшлося і без традыцыйнай латарэі, якая стала прыемным сюрпрызам.

С. Марыянна Алешчык