13 студзеня ў парафіі Найсвяцейшага Адкупіцеля ў Гродне адбыўся грандыёзны канцэрт сям’і польскіх музыкаў Паспяшальскіх. Творчая сям’я ўпершыню наведала Гродна, і гродзенцы спадзяюцца, што ў яе застануцца самыя прыемныя эмоцыі і ўспаміны.

У гэты вечар сям’я Паспяшальскіх прадставіла слухачам калядныя песні ў незвычайнай і прыгожай апрацоўцы. У кожную песню гэтыя людзі ўкладваюць душу, усё тое, што могуць і ўмеюць. З 14 артыстаў не было ніводнага, хто б не паказаў сваю індывідуальнасць на сцэне.

Падчас канцэрта Ян Паспяшальскі, заснавальнік і кіраўнік гэтага гурта, расказаў слухачам крыху пра сваю сям’ю, пра кожнага з тых, хто прысутнічаў на сцэне. Слухачам няпроста было паверыць у тое, што ўсе гэтыя людзі сапраўды адна сям’я, з’яднаная моцнай верай у Езуса Хрыста. Усе яны звязаны сямейнымі сувязямі: бацька, маці, брат, сястра… Акрамя сямейных сувязяў, іх злучае агульнае захапленне.

У размове з Сatholic.by Ян Паспяшальскі сказаў, што няма зусім нічога назвычайнага ў тым, што сям’я жыве такім супольным захапленнем, супольнай традыцыяй. «Любоў, веру і традыцыю перадалі нам нашы бацькі, а перадавалі іх учынкамі, жывым, натуральным спосабам. Мы ўжо з дзяцінства ўваходзілі ў гэта звычайным для нас чынам, усе пайшлі ў музычныя школы, скончылі акадэмію, кансерваторыю, а некаторыя вучацца там зараз», — распавёў Ян Паспяшальскі.

Пасля канцэрту выканаўцы задавальненнем выслухалі словы ўдзячнасці і захаплення ад слухачоў. Ян Паспяшальскі ўжо шмат гадоў праводзіць музычную майстэрню ў Івянцы, таму і ў Гродне сустрэў шмат сваіх старых знаёмых адтуль, паразмаўляў з імі і паабяцаў наведаць горад над Нёманам яшчэ раз.

«Людзям трэба даваць штосьці прыгожае. З думкай аб гэтым мы стварылі наш праект і маем надзею, што гэта неадраназовая акцыя. Тут прыгожыя людзі, тут мы маем свае зносіны, знаёмых, і маем надзею, што яшчэ вернемся ў Гродна», — сказаў Сatholic.by Ян Паспяшальскі.

Таксама пасля канцэрту ў слухачоў была магчымасць набыць дыск з калядкамі Паспяшальскіх і атрымаць подпіс ад усіх музыкаў.

«Канцэрт мне вельмі спадабаўся і дапамог правесці вечар ў цудоўнай кампаніі, атрымаць асалоду ад добрай музыкі. Нават паветра было насычана творчай атмасферай, якая, безумоўна, натхняе на нешта новае і крэатыўнае», — гаворыць Валерыя Суруда, якая вельмі доўга чакала сям’ю Паспяшальскіх у сваім горадзе.

«Немагчыма выказаць свае эмоцыі словамі, я проста ў захапленні. Гэты канцэрт проста вельмі спадабаўся мне, натхніў, прымусіў задумацца і матываваў працаваць для таго, каб дабіцца чаго-небудзь вялікага ў жыцці!» — кажа Аліна Зубко.

Канцэрт прайшоў у асаблівай, можна нават сказаць, цёплай сямейнай атмасферы. Слухачы жадаюць, каб Езус даў сіл гэтай сям’і, каб яна з яшчэ большым жаданнем і энтузіязмам спявала ў Яго хвалу і яшчэ не адзін раз выступіла з канцэртам, падрыхтаваным для жыхароў Гродна.

Марыя Алешчык, (AG)