Музычны гурт «Ave» Вышэйшай духоўнай семінарыі ў Гродне пакліканы дапамагаць людзям у праслаўленні Бога. 14 студзеня ўдзельнікі семінарыйнага гурта наведалі Прафесійна-тэхнічны ліцэй у Навагрудку, каб дзяліцца сваімі талентамі, якія ім даў Бог.

У актавай зале ліцэя семінарысты падарылі вялікай колькасці студэнтаў святочны канцэрт, раздзяліўшы з імі радасць нараджэння Езуса Хрыста. Удзельнікі гурта падчас канцэрту праслаўлялі Бога, а таксама набліжалі моладзі дарогу, якую самі абралі праз паступленне ў семінарыю.

Моладзь, якая сабралася на канцэрце, шчырым вітаннем прыняла гэтую радасную навіну, уключаючыся ў спеў, цешачыся і разам праслаўляючы Пана.

Гэта ўжо не першая сустрэча семінарыйнага гурта са студэнтамі. Семінарысты рэгулярна наведваюць навучальныя ўстановы не толькі ў святочны перыяд. Яны сустракаюцца з моладдзю, наладжваюць з ёю кантакты, а самае важнае — рэалізуюць праз гэта словы Хрыста: «Ідзіце і навучайце!»

У той жа дзень семінарыйны гурт разам з прэфектам семінарыі кс. Андрэем Лішко наведалі парафію Св. Міхала Арханёла ў Навагрудку. Там яны прынялі ўдзел у святой Імшы і выступілі са святочным канцэртам.

Кс. Юрый Марціновіч