9 студзеня ў касцёле парафіі Унебаўзяцця Найсвяцейшай Марыі Панны (Ліда-Індустрыяльны) адбылася чарговая аплаткавая сустрэча настаўнікаў і выхавацеляў, як працуючых, так i тых, хто знаходзiцца на заслужаным адпачынку. Ініцыятарам сустрэчы быў пробашч парафіі кс. Андрэй Агель.

На самым пачатку кс. Андрэй прывітаў сабраных цёплымі словамі, выказаў удзячнасць за прысутнасць і запрасіў на супольную малітву. Падчас малітвы прысутныя мелі магчымасць яшчэ раз падзякаваць Богу за 2015 год і папрасіць у новым Годзе Міласэрнасці падтрымкі ў працы.

Пасля малітвы настаў самы значны момант сустрэчы — дзяленне аплаткай, якая з'яўляецца сімвалам адзінства і дабра, злучае людзей. Падчас каляднай сустрэчы прысутныя складалі віншаванні і найлепшыя пажаданні адзін аднаму, дзелячыся белым кавалачкам хлеба.

Памяшканне, дзе праходзіла сустрэча, было напоўнена калядным настроем, галоўным атрыбутам з’яўляліся яслі з маленькім Езусам, гучалі аудыёзапісы калядак, усе жадаючыя падхоплівалі знаёмы матыў і спявалі калядныя песні.

Напрыканцы, дамаўляючыся аб наступнай сустрэчы, пробашч пажадаў усiм настаўнiкам, каб маленькі Езус аберагаў ад нягодаў, каб жыццё было напоўнена святлом, цяплом, радасцю і дабрабытам.

Паводле pijary.info, (AYU)