Другую гадавіну біскупскага пасвячэння дапаможны біскуп Гродзенскай дыяцэзіі Юзаф Станеўскі адзначаў у родных мясцінах. 31 студзеня іерарх наведаў парафію ў Заневічах.

Там у парафіяльным касцёле Найсвяцейшага Сэрца Пана Езуса i св. Язафата біскуп цэлебраваў святую Імшу падзякі ў інтэнцыі ўсіх тых, хто перадаў будучаму іерарху веру і вучыў любіць Пана Бога і людзей.

Наведваючы родную парафію, біскуп маліўся таксама перад хрысцільняй, дзе ў 1969 годзе атрымаў сакрамэнт хросту.

У гаміліі біскуп Юзаф Станеўскі падзякаваў усім людзям, якіх Бог пасылаў на дарозе яго жыцця. Сваім бацькам іерарх дзякаваў за перадачу веры і каталіцкае выхаванне, землякам - за жыццё, згоднае з правіламі Хрыстовага Евангелля, і за годны прыклад для наследавання. Іерарх зазначыў, што «вера базуецца на прыкладзе старэйшых людзей, якія адважна ў свой час баранілі святыні і ўсё тое, што святое».

Біскуп заахвоціў усіх прысутных у святыні да далейшага трывання ў веры, а таксама да малітвы ў інтэнцыі дзяцей і ўнукаў, каб у сённяшнім секулярызаваным свеце яны былі сапраўднымі сведкамі і актыўнымі нашчадкамі хрысціянскіх каранёў.

Таксама ў гэты дзень біскуп Юзаф Станеўскі наведаў суседнюю парафію Імя Найсвяцейшай Панны Марыі i св. Яна Непамука ў Вялікіх Эйсмантах, з якой звязаны карані яго бацькоў. Там падчас святой Імшы іерарх падзякаваў вернікам за вяртанне да традыцыйных набажэнстваў, якія з’яўляюцца вялікім скарбам Касцёла. Людская пабожнасць, якая бачная ў гэтай парафіі, як заўважыў біскуп, - гэта заслуга і пробашча кс. Валерыя Быкоўскага. Парафіяне ў гэты дзень віншавалі з імянінамі свайго душпастыра, які з вялікім клопатам дбае пра вернікаў.

Падчас наведвання парафіяльнай супольнасці ў Вялікіх Эйсмантах біскуп Станеўскі маліўся і за свайго былога пробашча кс. Юзафа Мацяеўскага, пахаванага на мясцовых могілках, які ўдзяляў хрост будучаму іерарху.

29 лістапада 2013 года Папа Францішак прызначыў ксяндза прэлата Юзафа Станеўскага дапаможным біскупам Гродзенскай дыяцэзіі з прысваеннем звання тытулярнага біскупа дыяцэзіі Tabaicara. 1 лютага 2014 атрымаў біскупскае пасвячэнне ў катэдральнай базыліцы св. Францішка Ксаверыя ў Гродне.

Кс. Юрый Марціновіч, (IL)