25-27 лютага ў Гродне адбыліся велікапосныя рэкалекцыі для душпастырства студэнтаў і працоўнай моладзі «Open». У рэкалекцыях, як паведаміў душпастыр моладзі кс. Антоні Грэмза, удзельнічала вялікая колькасць маладых людзей, якія пажадалі аднавіць свае адносіны з Богам і праз малітву і ўдзел у сакрамэнтах стаць Божым дзіцём.

Месцам правядзення духоўных практыкаванняў стаў гродзенскі рэктаральны касцёл Звеставання Найсвяцейшай Панне Марыі. Сёлета рэкалекцыі для моладзі праводзіў кс. Павел Рудзьман, душпастыр моладзі Пінскай дыяцэзіі.

Удзельнікі падзяліліся ўражаннямі ад рэкалекцый.

Алена Харольская:

«Калі ксёндз Антоні запрашаў на рэкалекцыі, усё, што мы ведалі са слоў ксяндза Антоні пра ксяндза Паўла, было тое, што ён “хуліган Хрыста”. Пры такой цікавай характарыстыцы было проста неразумна не пайсці на рэкалекцыі, хаця б дзеля цікаўнасці. І сапраўды, рэкалекцыі аказаліся вельмі цікавымі, прымусілі задумацца над уласным жыццём, над сваёй верай і адносінамі з Богам. Кожны па-свойму перажыў гэтае духоўнае (духоўна-баявое) навучанне, бо ўсе мы розныя і маем свой пэўны жыццёвы шлях і вопыт.

Ксёндз Павел вучыў, што ў веры, у справах і ў пакліканні трэба гарэць і не згараць, як незгаральны куст, які прыцягнуў позірк Майсея ў пустыні. Больш за тое, гэтым трэба запальваць іншых. Але многія задаюць сабе пытанне, як мець гэты запал, калі ў жыцці столькі праблем. Над гэтым пытаннем ксёндз Павел разважаў у сваёй канферэнцыі “Нашы любімыя сябры – праблемы”.

Часам чалавек настолькі пагружаецца ў свае праблемы, што не бачыць вакол нічога. Чалавек сам робіць гэтыя праблемы невырашальнымі. Калі азірнуцца назад і паглядзець на адну з праблем мінулага, то сёння мы ўспамінаем аб тых перажываннях з усмешкай. Праблемы будуць у нашым жыцці заўсёды, але не варта рабіць з іх боства. У Пасланні да Карынцянаў гаворыцца: “Вы не былі выпрабаваныя па-над людскія сілы. Бог, які ёсць верным, не дазволіць выпрабоўваць вас больш, чым маеце сілы, але разам з выпрабаваннем дасць і выйсце, каб вы маглі вытрываць” (1Кар 10, 13).

На завяршэнне ксёндз Павел параўноўваў хрысціян з арламі. Кожны хрысціянін павінен быць як арол, які шырока распраўляе крылы і ўзлятае ў самую вышыню». к

Алена Сапешка:

«Дзіўныя рэкалекцыі! Кожнае слова ксяндза Паўла было значным. У першы дзень я проста ўяўляла, як можна быць маладым і так любіць Бога, як жыццё з Богам акрыляе і напаўняе пазітывам! А на другі і трэці дзень я пераканалася, што прысвячаць маленькія кавалачкі жыцця Богу недастаткова, трэба давяраць Яму сваё жыццё, любіць Яго і гаварыць з Ім, як з лепшым сябрам! Быць іскрай, расказваць пра Бога іншым людзям! На рэкалекцыях было шмат цытат з Бібліі, цікавая, даступная інтэрпрэтацыя іх, шмат прыкладаў з жыцця, гісторый». r

Андрэй Лябецкі:

«Ніводных рэкалекцый я не чакаў, як гэтых. Ведаючы, што іх будзе праводзіць ксёндз Павел Рудзьман, я з кожным днём усё больш адчуваў жаданне прыняць у іх удзел. Ведаючы стыль зносінаў рэкалекцыяніста, я баяўся, што моладзь гродзенскіх парафій няправільна ўспрыме яго словы. Гэта пабуджала мяне да малітвы за гэтыя рэкалекцыі. Але насуперак маім чаканням усё прайшло на хвалу Божую.

Я думаю, што гэтыя рэкалекцыі дапамаглі моладзі паглядзець на многія праблемы ў сваім жыцці з іншага боку. Калі ты абіраеш Езуса сваім кумірам, то ў цябе толькі адзін напрамак: толькі наперад, толькі “algat”, і толькі арлы асільваюць межы». r

Вольга Снітко:

«“Тыя, хто спадзяеццца на Пана, адновяць сілы, расправяць крылы, як арлы, пабягуць і не стомяцца, пойдуць і не знясіляцца” (Іс 40, 31).

Нам прычыняе боль не тое, што акружае нас, але тое, што адбываецца ў нас саміх, і тое, што сыходзіць з нас. Мы не вырасцім арлянят свабоднымі дарослымі арламі, калі не апынемся ў цяжкім месцы, у праблемах, з якіх, як здаецца, няма выйсця. Мы ніколі не перажывем цуд, калі мы нарэшце не выйдзем з гэтага гнязда і не пачнем прыкладваць намаганні. Гэта ўсё частка нашага навучання палётам». кПасля завяршэння рэкалекцыі многія іх удзельнікі разважаюць над тым, пра што даведаліся на іх: ці гатовы я нарэшце змяніць сваё звычайнае жыццё, выйсці з гнязда, выйсці з зоны камфорту?

(JM), (AG)