Цёплая і цікавая сустрэча адбылася ў вёсцы Галавічполле, куды ў дзіцячы дом-інтэрнат у чарговы раз завіталі навучэнцы Вышэйшай духоўнай семінарыі ў Гродне. У доме-інтэрнаце іх з нецярплівасцю чакалі дзеці-інваліды.

Семінарысты на чале з прэфектам кс. Андрэем Лішко наведалі сваіх даўніх сяброў, каб разам з імі паразважаць над значэннем падзей, якія адбываліся ў час мукі і смерці Хрыста. Падчас сустрэчы з дзецьмі навучэнцы семінарыі таксама дзяліліся сведчаннем уласнага духоўнага перажывання велікапоснага перыяду, паспрабавалі накіраваць іх позірк на набліжэнне самай вялікай і неспасцігальнай таямніцы ў гісторыі чалавецтва – Уваскрасення Езуса Хрыста.    

Уражанні, якія атрымалі госці падчас сумеснай размовы і разважанняў з дзецьмі, напэўна, надоўга застануцца ў сэрцах семінарыстаў і паспрыяюць іх духоўнаму станаўленню на шляху да служэння самым бедным і пакінутым.

(AG)