11 сакавіка ў араторыі імя блл. мучанікаў з Познані пасля святой Імшы і Крыжовага шляху адбылася сустрэча-разважанне для дзяцей і моладзі «Крыж цярпення, або крыж — крыніца шчасця».

Удзельнікам сустрэчы было прапанавана паразважаць над пытаннямі: «Што такое крыж?», «Чым з’яўляецца крыж у маім жыцці?», «Як крыж цярпення ператварыць у крыніцу сапраўднага шчасця?»

У размове з прысутнымі кс. Здзіслаў Пікула SDB падкрэсліў: «Езус і Яго Крыж з’яўляюцца адзінай дапамогай для беднага і грэшнага чалавека. Крыж Езуса — гэта самы вялікі скарб у жыцці кожнага з нас, які не трэба шукаць, а дастаткова толькі з падзякай прыняць яго».

Працягам рэалізацыі праекта-разважання «Да Езуса з ксяндзом Боско» стаў тэматычны вечар «Кансэкраваная асоба», які адбыўся ў дзятлаўскім араторыі 12 сакавіка. На гэты вечар быў запрошаны кс. Здзіслаў Вэдэр SDB.

Падчас сустрэчы святар звярнуў увагу на сэнс паклікання, на тое, як распазнаць сваё пакліканне ў жыцці, на асаблівасці манаскага жыцця.

Ксёндз Здзіслаў Вэдэр заклікаў маліцца аб пакліканнях, а таксама мець адкрытае сэрца і быць гатовым прыняць запрашэнне ісці за Хрыстом, выбраўшы шлях манаства або святарства.

Паводле sdb.by

(MV)