У Вялікую cуботу дабрачыннае каталіцкае таварыства «Карытас» парафіі Свв. апосталаў Пятра і Паўла ў Іўі правяло акцыю па збору прадуктаў для патрабуючых.

З прынесеных парафіянамі прадуктаў былі ўладкаваны прадуктовыя наборы і святочныя пасылкі для шматдзетных і патрабуючых сем'яў Іўеўшчыны і ваколіц. Таксама побач з прадуктамі вернікі пакідалі па велікодным яйку.

Як распавёў Catholic.by пробашч парафіі ў Іўі кс. Ян Гавецкі, людзі з інтузіязмам успрынялі прапанову, у выніку прадуктовых набораў было сабрана больш за 300 кг, а велікодных яек было сабрана каля 600 штук.

Перад нядзеляй Божай Міласэрнасці супрацоўнікі і валанцёры «Карытас» на чале з кс. Янам Гавецкім наведалі шэраг устаноў і дзясяткі патрабуючых сем’яў, каб перадаць ім велікодныя падарункі. У прыватнасці, былі наведаны Ашмянскі інтэрнат дзяцей-сірот і псіханеўралагічны дыспансер у Навагрудскім раёне.

Святар дадаў, што асобна прымалі ўдзел у дабрачыннасці і дзеці. У межах акцыі «Ад мяне майму сябру» маленькія парафіяне прыносілі для дзяцей са шматдзетных сем’яў мяшочкі з сэрцайкамі, якія запаўнялі цацкамі і цукеркамі.

«Радуе, што парафіяне актыўна адгукнуліся на дабрачынную акцыю, — адзначыў кс. Ян Гавецкі. — Я ў сваю чаргу цешуся, што перад нядзеляй Міласэрнасці нам удалося зрабіць па-сапраўднаму важную справу і адведаць шмат патрабуючых».

(IL), фота Міхаіла Точкі