3 красавіка ў Доме культуры ў Навагрудку адбылася канцэртна-віншавальная праграма «Радасць Уваскрасення». Яна была ўпершыню арганізавана парафіяльнай супольнасцю ў Навагрудку сумесна з мясцовай уладай.

Ганаровымі гасцямі мерапрыемства сталі сёстры назарэтанкі на чале з настаяцельніцай кляштара ў Навагрудку с. Лаўрай Шукеловіч, намеснік старшыні Навагрудскага райвыканкама Святлана Каралько, начальнік аддзела адукацыі, спорту і турызму Алег Анікевіч і іншыя прадстаўнікі ўлады, прадстаўнікі Праваслаўнай Царквы ў Навагрудку, імам мячэці ў Навагрудку Якуб Хаджы Александровіч.

Прысутных прывітаў пробашч парафіі Святога Міхала Арханёла ў Навагрудку кс. Юрый Жэгарын, які павіншаваў усіх прысутных са святам Уваскрасення Хрыста і запрасіў акунуцца падчас канцэрту ў атмасферу ўваскрасення Езуса.

Намеснік старшыні райвыканкама Святлана Каралько падзякавала за запрашэнне на гэтае «цудоўнае мерапрыемства дабрыні, шчырасці, мерапрыемства, дзе будзе валадарыць моладзь, наша будучыня». «Нездарма кажуць: тое, што мы пасеем у душах нашых дзяцей, тое пажнём у будучыні. Хачу павіншаваць усіх са святам светлай Пасхі, пажадаць Божай ласкі, спакою, дабрыні і здароўя вашым сем’ям», – сказала намеснік старшыні райвыканкама, дадаўшы, што «такія мерапрыемствы будуць толькі на карысць усім нам».

Падчас канцэртна-віншавальнай праграмы выступілі з песнямі і вершамі вучні нядзельнай школы парафіі Святога Міхала Арханёла. Таксама яны прадставілі кароткую пантаміму «Бездань і ісціна». Не абыйшлося свята без узгадвання знакамітага земляка Адама Міцкевіча. Была паказана кароткая лірычная пастаноўка «Развітальны паланэз для Адама і Марылі», гучалі ўрыўкі з твораў паэта, песні на слова Адама Міцкевіча ў выкананні калектыва «Свіцязянка». На свята завіталі і госці з Ліды – калектыў «Міласць».

Напрыканцы былі падведзены вынікі віктарыны, пытанні да якой былі надрукаваны ў раённай газеце «Новае жыццё». Прыняць удзел у віктарыне маглі ўсе жадаючыя незалежна ад веравызнання. Пераможцам стаў Дзяніс Шах, які даў вельмі грунтоўныя адказы. Другое месца ў Дар’і Жынко, трэцяе – y Валянціны Булько. Таксама была праведзена бяспройгрышная латарэя.

Падчас перапынку ў канцэртнай праграме госці маглі пазнаёміцца з выставамі работ майстроў дэкаратыўна-прыкладнога мастацтва і пачаставацца пасхальнымі прысмакамі.

(AG)