У Цэнтры сацыяльнага абслугоўвання насельніцтва ў Лідзе адбыліся сустрэчы для людзей пажылога ўзросту і шматдзетных сем’яў з удзелам каталіцкага святара — кс. Юрыя Бяганскага.

У аддзяленні для грамадзян пажылога ўзросту «Актыўнае даўгалецце», у межах гуртка «Польская мова і культура Польшчы» адбылася тэматычная сустрэча «Таямніца малітвы». Падчас сустрэчы з пажылымі людзьмі горада Ліды кс. Юрый Бяганскі казаў аб значэнні малітвы ў жыцці кожнага хрысціяніна.

Святар адзначыў, што малітва павінна пастаянна спадарожнічаць кожнаму чалавеку, і даў практычныя парады, як добра маліцца, каб выпрасіць у Бога патрэбныя ласкі. Ксёндз Юрый Бяганскі звярнуў увагу, што тое, ці будзе малітва выслухана, залежыць не ад колькасці слоў, а ад запалу душаў.

На сустрэчы з членамі шматдзетных сем’яў адбылася актыўная дыскусія на тэму салідарнасці і любові. Ксёндз Юрый Бяганскі распавёў таксама пра Юбілейны Год Міласэрнасці, які зараз перажывае Каталіцкі Касцёл. Святар адзначыў, што гэта асаблівы час ласкі, які дае Касцёл, каб аднавіць сваё жыццё, з даверам глядзець у будучыню, быць тымі, хто, спазнаўшы міласэрную любоў, будзе будаваць валадарства любові з братамі.

Кажучы пра любоў, святар заахвоціў адкрываць яе сапраўдную вартасць, каб яна заззяла нанова і стала прынцыпам асабістага, сямейнага, грамадскага і культурнага жыцця.

Кс. Юрый Марціновіч, (AG)