30 красавіка ў Вышэйшай духоўнай семінарыі ў Гродне адбылася дыяцэзіяльная сустрэча супрацоўнікаў медыцынскіх устаноў, арганізатарам якой выступіла Душпастырства службы аховы здароўя Гродзенскай дыяцэзіі на чале з кс. Віталіем Сідоркам.

У сустрэчы прынялі ўдзел работнікi бальніц, паліклінік, дамоў сацыяльнай апекі, студэнты, медыкі-пенсіянеры, а таксама святары з розных мясцін дыяцэзіі. Сустрэча была прымеркавана да Юбілейнага Году Міласэрнасці. Дэвізам яе сталі словы евангеліста Лукі: «Будзьце міласэрныя, як і Айцец ваш міласэрны».

На пачатку сустрэчы ўдзельнікаў канферэнцыі прывітаў кс. Віталій Сідорка, які ва ўступным слове нагадаў радкі з Хартыі работнікаў службы аховы здароўя, дзе падкрэсліваецца, што прафесія медыкаў патрабуе, каб яны былі захавальнікамі і слугамі чалавечага жыцця: «Не дастаткова навуковага і прафесійнага вопыту. Неабходны асабісты ўдзел у канкрэтнай сітуацыі кожнага асобнага пацыента, праява чалавечнасціі міласэрнасці, якія ў дзейнасці медыка павінны рэалізоўвацца кожны дзень».

Аб тэарэтычных і практычных аспектах міласэрнасці распавёў кс. Аляксандр Махнач SP, вікарый парафіі Унебаўзяцця Найсвяцейшай Панны Марыі ў Лідзе. Дакладчык адзначыў, што міласэрнасць – гэта не толькі спачуванне, але і вера, вернасць, адданасць, гэта дасканаласць дабра. Аказваючы міласэрнасць, медык, па словах святара, становіцца інструментам Хрыста, супрацоўнікам Бога ў служэнні бліжняму.

У дакладзе «Эмацыйныя аспекты ў медыцынскай практыцы» ўрач-псіхатэрапеўт, асістэнт кафедры псіхіятрыі і наркалогіі Гродзенскага дзяржаўнага медыцынскага ўніверсітэта Аляксандра Янкоўская закранула псіхалагічныя аспекты актуальных у медыцынскай практыцы праблем стрэсу і гневу і паказала шляхі да іх пераадолення.

Першая частка канферэнцыі завяршылася святой Імшой, якую ўзначаліў дапаможны біскуп Гродзенскай дыяцэзіі Юзаф Станеўскі. Іерарх заклікаў медыкаў заўсёды кіравацца ў сваёй працы прыкладам Езуса Хрыста, найлепшага лекара і настаўніка, вучыцца ў Яго далікатнасці, любові, разуменню, гатоўнасці служыць.

У межах сустрэчы адбылася таксама экскурсія па катэдральнай базыліцы св. Францішка Ксаверыя, якую правёў пробашч парафіі кс. Ян Кучынскі.

Пасля малітоўнай часткі з дакладам выступіла дырэктар Гродзенскага дзіцячага хоспіса Вольга Шульга. Дакладчыца падзялілася вынікамі і перспектывамі развіцця сістэмы аказання паліятыўнай дапамогі цяжкахворым дзецям.

На заканчэнне сустрэчы адказы на пытанні «Як дапамагчы залежнаму чалавеку? Дзе мяжа паміж міласэрнасцю і сузалежнымі паводзінамі, дапамогай і памылкай?» даў у сваім дакладзе Юрый Гапонік, кансультант тэрапіі залежнасцяў аддзялення рэабілітацыі для асобаў з залежнасцямі ГАКЦ «Псіхіятрыя – наркалогія».

Cустрэча завяршылася супольнай малітвай.

Караліна Бутоліна