Першы дзень XXIII Дзён моладзі Гродзенскай дыяцэзіі ў Мастах, 7 мая, пачаўся адарацыяй Найсвяцейшага Сакрамэнту. Моладзь на каленях прасіла аб дары глыбокай веры для сябе, каб супрацьстаяць розным спакусам, якія актыўна прапануе сучасны свет.

Падчас адарацыі арганізатар Дзён моладзі кс. Антоні Грэмза маліўся ў інтэнцыі ўсіх удзельнікаў, якія прыбылі на сустрэчу, і ў інтэнцыі моладзі ўсёй дыяцэзіі, паколькі будучыня Касцёла залежыць менавіта ад моладзі, і таму вельмі важна, каб у сваім штодзённым жыцці яна рэалізоўвала запаведзь любові – любіць Бога і цаніць іншага чалавека.

Галоўным пунктам гэтага дня была святая Імша ў касцёле Маці Божай Тройчы Цудоўнай у Мастах. Усіх сардэчна прывітаў пробашч парафіі кс. Віктар Ханько, які адзначыў, што для невялікай парафіяльнай супольнасці вялікі гонар прымаць маладых людзей з розных парафій дыяцэзіі. Таксама святар прасіў моладзь даць яскравае сведчанне для яго парафіян і для горада Масты, які іх прымае.

У гаміліі кс. Антоні Грэмза заахвоціў прысутную ў святыні моладзь быць адважнымі сведкамі ўваскрослага Пана ў сучасным свеце.

«Свету патрэбна ваша сведчанне, Касцёлу патрэбна ваша прыгожая маладосць і ваш дух. Будзьце сведкамі міласэрнасці, дайце гэтую міласэрнасць іншым людзям», – дадаў святар.

Таксама ў гэты дзень моладзь паслухала канферэнцыю «Шчаслівыя міласэрныя, бо яны міласэрнасць спазнаюць», з якой выступіў прэфект Вышэйшай духоўнай семінарыі ў Гродне кс. Андрэй Лішко.

Святар заклікаў удзельнікаў сустрэчы не толькі прасіць у сваім жыцці аб Божай міласэрнасці, асабліва тады, калі яны адчуваюць якуюсьці трывогу, але і даваць міласэрнасць іншым, наследаваць дабрыню Бога.

Ксёндз Андрэй Лішко патлумачыў, што, калі толькі прасіць аб міласэрнасці для сябе, а не быць міласэрным да іншых, то чалавек зачыніць сваё сэрца на дар Божай любові.

«Будзем жа міласэрнымі адзін да аднаго, каб Бог мог праявіць у дачыненні да нас гэтае найпрыгажэйшае вымярэнне сваёй бясконцай любові, якім з’яўляецца міласэрнасць», – сказаў святар.

Першы дзень Дыяцэзіяльных дзён моладзі завяршыўся канцэртам супольнасці Душпастырствa студэнтаў і старэйшай моладзі г. Гродна «OPEN».

Канцэрт выявіў энтузіязм, з якім удзельнікі, кожны з якіх адметны і кожны ўносіць свой уклад у гэтую сустрэчу, прыбылі ў Масты, на гэтае мерапрыемства – месца сустрэчы маладога чалавека з Богам і сваімі равеснікамі. Таксама ён стаў сапраўдным праслаўленнем Бога, багатага на міласэрнасць і ласку.

XXIII Дні моладзі Гродзенскай дыяцэзіі праходзяць у парафіi Маці Божай Тройчы Цудоўнай у Мастах пад дэвізам «Пакліканыя быць прыладамі Божай міласэрнасці». У іх удзельнічаюць каля 1500 чалавек з розных месцаў дыяцэзіі, а таксама прадстаўнікі Мінска-Магілёўскай архідыяцэзіі і Пінскай дыяцэзіі.

Анастасія Мішкура, (AG)