Мітрапаліт Мінска-Магілёўскі арцыбіскуп Тадэвуш Кандрусевіч прыняў удзел у працэсіі Божага Цела, якая адбылася 7 чэрвеня падчас Усерасійскага Эўхарыстычнага кангрэса ў Навасібірску. Усерасійскі Эўхарыстычны кангрэс “Я есмь хлеб жизни” (Ян 6, 35) праходзіў з 5 па 7 чэрвеня. Беларускі іерарх выступаў на кангрэсе з дакладам.

Падчас працэсіі Божага Цела арцыбіскуп Тадэвуш Кандрусевіч прамовіў гамілію каля другога алтара. Іерарх разважаў у ёй над чытаннем Евангелля, якое апавядае аб цудзе памнажэння хлябоў (Мк 8, 1-9), калі “Езус не толькі прадэманстраваў свае звышнатуральныя магчымасці, але і збавіў людзей ад вернай смерці”.

Потым, напярэдадні сваёй смерці, Езус падчас Апошняй Вячэры, як нагадаў Мітрапаліт, “паўтарыў тое ж самае і ўстанавіў сакрамэнт Эўхарыстыі, каб на ўсе часы застацца з намі пад выглядам хлеба і віна”.

Арцыпастыр нагадаў, што “тысячы людзей на гэтай зямлі падчас ганенняў не мелі магчымасці часта прымаць Эўхарыстыю, таму што не было святыняў і святароў”, але “трэба было бачыць іх радасць, калі камусьці ўдавалася паехаць у Літву або ў заходнія вобласці Беларусі ці Украіны, каб паспавядацца, прыняць удзел у святой Імшы і прыняць Камунію”. “Сёння мы жывем у іншых умовах. У Расіі і, у прыватнасці, у Сібіры, Касцёл адрадзіўся. Гэта дар і ласка, але адначасова і пакліканне не пакінуць Пана і жыць Яго праўдай”, - падкрэсліў Мітрапаліт.

Іерарх дадаў, што, “на жаль, сучасны свет усё часцей жыве так, як быццам бы Бог зусім не існаваў”, “на месца Бога ставіць самога сябе, гэтым самым пераварочваючы ўсталяваны Творцам парадак з ног на галаву”, і “адсюль бяруцца ўсе праблемы”.

Мітрапаліт звярнуў увагу на тое, што хрысціяне “павінны жыць згодна з Евангеллем і сваім жыццём сведчыць, што Бог не памёр, а жыве”.

“Дзякуючы цуду памнажэння хлябоў Ён не дазволіў людзям памерці ў пустыні. А сабраныя сем кашоў кавалкаў хлеба, што засталіся, сімвалізуюць тое, што ў Бога ёсць яшчэ больш, чым Ён раздаў, а Яго міласэрнасць бязмежная, - адзначыў арцыпастыр. - Дзякуючы цуду Эўхарыстыі Ён падтрымлівае наша духоўнае жыццё на зямлі, каб мы былі не штучнымі, а сапраўднымі хрысціянамі, і вядзе ў жыццё вечнае”.

Мітрапаліт Тадэвуш Кандрусевіч заклікаў прысутных вернікаў не забываць з гэтай прычыны дарогі да святыні, бо “там у Святых Дарах Бог чакае нас”.

(AG)
Фота Наталлі Гілёвай, www.cathmos.ru