28 снежня, у свята Святой Сям’і, адбылася аплатковая сустрэча Мітрапаліта Мінска-Магілёўскага арцыбіскупа Тадэвуша Кандрусевіча з сямейнымі рухамі. Сустрэча праходзіла ў касцёле св. Сымона і св. Алены ў Мінску.

У межах сустрэчы Мітрапаліт узначаліў святую Імшу. У гаміліі іерарх звярнуў увагу, што, адзначаючы свята Святой Сям’і, Касцёл тым самым “хоча падкрэсліць праўду аб тым, што Хрыстус прыйшоў у гэты свет у сям’і і таму сям’я павінна быць месцам прабывання Бога”.

Арцыпастыр нагадаў, што сёння сям’я перажывае не бачны дагэтуль крызіс. Таксама іерарх узгадаў пра Сінод Біскупаў, прысвечаны сям’і, які адбыўся ў кастрычніку гэтага года ў Ватыкане. “Сучасная сям’я – гэта не што іншае, як духоўны Чарнобыль, гэта як быццам эпідэмія духоўнай эболы. Праблему крызісу сям’і належыць шукаць у крызісе веры, які ахапіў свет”, - дадаў арцыбіскуп.

“Касцёл заахвочвае нас глядзець на Святую Сям’ю, на Езуса, Марыю і Юзафа, каб чэрпаць з яе натхненне, браць прыклад і адвагу. Марыя і Юзаф працавалі цяжка, дапамагалі адно аднаму, разумелі адно аднаго і апекаваліся Езусам, каб Ён мог гарманічна развівацца як з чыста чалавечага, так і з боскага пункту гледжання. Гэтага вельмі не хапае сучасным сем’ям, якія найбольш клапоцяцца аб матэрыяльным і інтэлектуальным выхаванні сваіх дзяцей, але забываюцца пра духоўнае і чалавечае”, - адзначыў Мітрапаліт.

“Ці сучасныя бацькі кожны дзень моляцца, кожную нядзелю і свята спяшаюцца разам з дзецьмі ў касцёл на набажэнствы, ці часта прыступаюць да сакрамэнту пакаяння і святой Камуніі, ці даюць ім прыклад хрысціянскага жыцця? На жаль, на гэтыя пытанні сучасныя сем’і вельмі часта не могуць даць станоўчага адказу. Нашы дамы і памяшканні, замест таго, каб быць месцамі, дзе жыве сям’я як хатні Касцёл, становяцца гатэлямі, куды бацькі і дзеці прыходзяць толькі каб пераначаваць. Няма дыялогу паміж бацькамі і дзецьмі. Усе занятыя сваімі справамі і жывуць як быццам у сваім уласным гетта, - канстатаваў іерарх. - Калісьці сумесны стол, абед ці вячэра, збіралі сям’ю разам. Цяпер, у эпоху фастфудаў, ён амаль што знік. А калі яшчэ час ад часу існуе, то пасля спажывання ежы ўсе разбягаюцца па сваіх кутках: маці на кухню, бацька да тэлевізара, а дзеці да камп’ютараў”.

“Марыя з Юзафам ахвяравалі Езуса Богу ў Ерузалемскай святыні. Дзе і каму сучасныя бацькі ахвяроўваюць сваіх дзяцей? Гандлёва-забаўляльныя цэнтры сталі новымі касцёламі. Але там мы не спаткаем Бога. Таму сённяшняе свята яшчэ раз звяртае ўвагу бацькоў на іх адказнасць за выхаванне маладога пакалення ў духу любові да Бога і бліжняга”, - падкрэсліў арцыпастыр.

Поўны тэкст гаміліі>>>

Мітрапаліт заахвоціў удзельнікаў Імшы “даверыць у гэты дзень нашы сем’і Езусу, Марыі і Юзафу, каб Святая Сям’я духоўна прысутнічала ў іх жыцці, каб нашы беларускія сем’і былі хатнімі Касцёламі, месцам нараджэння і прыняцця новага жыцця, выхавання маладога пакалення згодна з прынцыпамі Евангелля, школай евангелізацыі і падрыхтоўкі да самастойнага жыцця, радасцю і надзеяй нашай Бацькаўшчыны”.

Пасля Імшы Мітрапаліт і ўсе ўдзельнікі сустрэчы падзяліліся аплаткай з нагоды святаў Божага Нараджэння.

(AG)

Фота Аляксандры Шчыглінскай