«Чаму Езус уехаў у Ерузалем не на кані, а на восліку?» — запытаўся ў самых малодшых вернікаў Мітрапаліт Тадэвуш Кандрусевіч падчас Імшы для дзяцей на Пальмовую нядзелю 29 сакавіка ў мінскай архікатэдры.

І ў гэты раз акторы разам з вослікам удзельнічалі ў працэсіі, якая адбывалася каля катэдры перад Імшой. Прысутныя вернікі ўжо асвечанымі каляровымі вербачкамі віталі працэсію, прыгадваючы той момант, калі Езус урачыста ўваходзіў у Ерузалeм.

Падчас Імшы з дзецьмі Мітрапаліт Мінска-Магілёўскі арцыбіскуп Тадэвуш Кандрусевіч вёў з маленькімі вернікамі размовы. Дзеці, якіх перад алтаром сабралася дружная і шматлікая кагорта, актыўна ўдзельнічалі ў дыялогу з арцыбіскупам.

«Не трэба баяцца адказваць,— папярэдзіў малечу арцыпастыр, — гэта ж не экзамен».

Дзеці, адказваючы на пытанні арцыбіскупа, маглі прадэманстраваць свае веды пра Пальмовую нядзелю і Вялікдзень.

Пасля святой Імшы малых чакала забава і вялікая радасць, бо, акрамя таго, што восліка Юлія можна было пацерабіць за вухам і правесціся рукою па яго чорнай чупрыне, дзеці маглі на ім і пакатацца.

Пасля Імшы для дзяцей Мітрапаліт Тадэвуш Кандрусевіч узначаліў яшчэ адну Імшу, дзе падчас гаміліі заклікаў вернікаў з верай распачаць падарожжа Вялікага тыдня, якое павінна мець сэнс. А каб яно мела сэнс, як адзначыў іерарх, трэба быць «часткай Касцёла, як Містычнага Цела Хрыста».

«Неабходна быць разам з Хрыстом на крыжы. Як члены Касцёла мы павінны прызнаць сваю грэшнасць і існуючы ў нас патэнцыял для дабра», — дадаў арцыбіскуп.

Аксана Ючкавіч,

Фота Аляксандры Шчыглінскай