2 красавіка, у Вялікі чацвер, у мінскім архікатэдральным касцёле Імя Найсвяцейшай Панны Марыі адбылася святая Імша Вячэры Пана.Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч, у ёй прымаў удзел Апостальскі Нунцый у Беларусі арцыбіскуп Клаўдыё Гуджэроцці.

Важным момантам Імшы стаў абрад абмыцця ног 12 мужчынам на ўспамін пра ўчынак Езуса, які перад Апошняй Вячэрай абмыў ногі сваім вучням. Абрад здзейснілі Мітрапаліт і Апостальскі Нунцый.

У гаміліі Мітрапаліт Тадэвуш Кандрусевіч звярнуў увагу, што ў цэнтры гэтай цэлебрацыі знаходзіцца памяць: “Гэтыя словы, якімі быў устаноўлены сакрамэнт Эўхарыстыі, з’яўляюцца б’ючымся сэрцам нашай каталіцкай веры. З усіх гэтых слоў адно з’яўляецца асаблівым – памяць: “Гэта чыніце на Маю памяць” (1 Кар 11, 24)”.

“Праз устанаўленне Эўхарыстыі Езус кажа, як мы павінны Яго памятаць. А менавіта найперш у Эўхарыстыі, дзякуючы якой Ён знаходзіцца сярод нас і разам з намі.

Памятаць Яго мы павінны і таму, што Ён прадстае перад намі як слуга, - патлумачыў іерарх. - Мы, хрысціяне, пакліканы з пакорай і любоўю мыць адзін аднаму ногі, так, як чыніў Езус”.

“На працягу гэтых двух тысячагоддзяў мы становімся на калені і мыем ногі адзін аднаму на знак узаемнай любові і на знак таго, што хрысціянская любоў з’яўляецца найбольш значнай сілай на зямлі, так, што нават няверуючыя кажуць: “Глядзіце, як гэтыя хрысціяне любяць адзін аднаго”. Сапраўды, як важна, каб іншыя бачылі, што мы чынім на памяць аб Езусе! Гэта значна больш варта, чым тысячы слоў”, - падкрэсліў Мітрапаліт.

Поўны тэкст гаміліі>>>

Арцыпастыр дадаў таксама, што Эўхарыстыя – “пасілак на нашае зямное падарожжа”, і “неабходна падрыхтаваць сябе належным чынам да яе прыняцця, каб мы маглі распачаць гэтае падарожжа, як падарожжа змаганняў са злом і адначасова падарожжа веры”.

Пасля Імшы Найсвяцейшы Сакрамэнт быў перанесены ў бочную наву — спецыяльна падрыхтаванае месца, якое сімвалізуе цямніцу, дзе пасля арышту знаходзіўся Езус.

З алтара быў зняты абрус, табэрнакулюм застаўся пустым і прыадчыненым. Ад гэтага моманту Эўхарыстыя не будзе цэлебравацца да Пасхальнай вігіліі. Ля сімвалічнай цямніцы вернікі адаруюць Езуса Хрыста ў Найсвяцейшым Сакрамэнце.

(AG) 

Фота Аляксандры Шчыглінскай