Святую Імшу на пачатак Вялікага посту ў Папяльцовую сераду на 12.00 у мінскім архікатэдральным касцёле Імя Найсвяцейшай Панны Марыі цэлебраваў Мітрапаліт Мінска-Магілёўскі арцыбіскуп Тадэвуш Кандрусевіч.

У сваёй гаміліі іерарх закрануў тэму грэшнасці чалавека і нагадаў пра важнасць хрысціянскага пакаяння.

«Праблемай і нават трагедыяй сучаснага чалавека ёсць тое, што ён згубіў пачуццё граху, — адзначыў Мітрапаліт. —  Аднак усе мы грэшныя і ўсе маем патрэбу ў навяртанні».

Арцыпастыр заахвоціў вернікаў у час Вялікага посту да ўдзелу ў пакутных набажэнствах і святой споведзі, «дзе бязмежны ў сваёй міласэрнасці Езус ачысціць нас з нашых грахоў лепш, чым найлепшая пральная машына».

Паводле слоў іерарха, Вялікі пост — гэта час духоўнага бою з грахом і злымі звычкамі. «Мы не адны ў гэтым баі, бо з намі Хрыстус, і калі даверымся Яму, то пераможам», — дадаў Мітрапаліт.
Аcаблівую ўвагу ў гаміліі арцыбіскуп Тадэвуш Кандрусевіч прысвяціў тром элементам, так важным для хрысціян у час Вялікага посту: малітве, посту і міласціне.

«Нагадваючы пра малітву, пост і міласціну, Езус паказвае ўсю іх духоўную сутнасць. У гэтых практыках мы павінны шукаць не сваёй славы, але славы Бога. Бог глядзіць не на тое, як мы выглядаем звонку, але на стан сэрца», — сказаў іерарх.

Тэкст гаміліі цалкам тут››

Арцыбіскуп Кандрусевіч падкрэсліў, што сапраўдная пабожнасць праяўляецца ў павазе, пашане і паслухмянасці Богу:

«За гэта Езус абяцае ўзнагароду, якая і праяўляецца ў нашых адносінах з Богам, у якім мы знаходзім паўнату жыцця, шчасця і праўды. Бог жадае нас абнавіць духоўна. Ці мы хочам гэтага і ці дазваляем Яму гэта ўчыніць? — вось пытанне, якое стаіць перад намі на пачатку Вялікага посту».

«Пане Езу, адары нас вытрымкай і жывой верай, цвёрдай надзеяй і вялікай любоўю да Бога і бліжніх у гэты час ласкі і навяртання, каб пасля 40 дзён посту мы з чыстай душой спявалі радаснае “Алелюя”, як песню хвалы Уваскросламу Пану», — заключыў арцыпастыр.

(DN), (IL)

У матэрыяле выкарыстаны архіўныя здымкі Аляксандры Шчыглінскай з Папяльцовай серады ў 2015 годзе