6 жніўня, ва ўрачыстасць Перамянення Пана, у парафіі Перамянення Пана ў в. Негарэлае адбылося асвячэнне новай святыні. Асвячэнне здзейсніў Мітрапаліт Мінска-Магілёўскі арцыбіскуп Тадэвуш Кандрусевіч.

Звяртаючыся да ўдзельнікаў урачыстасці, Мітрапаліт сказаў, што на мапе Мінска-Магілёўcкай архідыяцэзіі з’явіўся такім чынам яшчэ адзін касцёл як месца спаткання чалавека з Богам.

Іерарх выказаў шчырую падзяку ўсім, хто паспрыяў будаўніцтву гэтага касцёла: вернікам, якія вельмі актыўна імкнуліся да мэты мець сваю святыню, Кангрэгацыі Місіянераў Святой Сям’і, якая рэалізавала гэты праект, прадстаўнікам дзяржаўнай улады за дазвол на будаўніцтва, дабрадзеям, спонсарам, архітэктарам і будаўнікам.

Разважаючы над сцэнай Перамянення Пана, апісанай у Евангеллі, Мітрапаліт адзначыў у гаміліі: «Сваім Перамяненнем Езус рыхтаваў апосталаў да цяжкіх выпрабаванняў. Падчас Перамянення на гары Табор разам з апосталамі прысутнічалі таксама Майсей і Ілля, якія размаўлялі з Езусам пра Яго блізкую крыжовую смерць. Майсей – вялікі даўца Божага закону, а Ілля – вялікі прарок. Тады з нябёсаў прагучаў голас Бога: “Гэта Мой Сын умілаваны, Яго слухайце”. Такім чынам распачаўся пераход ад Старога Запавету да Новага».

Арцыпастыр дадаў, што Перамяненне Езуса мела вялікае значэнне як для Яго самога, так і для апосталаў. Да гэтага часу, адзначыў іерарх, Езус быў вядомы як выдатны прамоўца і цудатворца, цяпер жа Ён павінен быў пайсці на Кальварыю, таму «Перамяненне на гары Табор стала як быццам уводзінамі ў Яго славу, якую Ён атрымаў у пасхальнай таямніцы крыжовай смерці і Уваскрасення».

«Словы Пятра, што ім там было добра, сведчаць аб тым, што апосталы не хацелі пакінуць гару Табор. Не хацелі яны таксама чуваць разам з Езусам у Гетсіманскім садзе. Не хацелі быць разам з Ім, калі Ён быў арыштаваны, і разбегліся.

Кожны з нас можа ідэнтыфікаваць сябе з імі, бо на гары нашай кар’еры ці шчаслівага жыцця мы таксама хацелі б застацца назаўсёды. Аднак жыццё пражыць – гэта не поле перайсці. У жыцці чалавека шмат выпрабаванняў. Мы часта падобныя да апосталаў і ўцякаем ад цяжкасцяў. Забываемся, што Хрыстус не абяцаў нам сад з ружаў, але аліўны сад і цярновую карону. Хрыстус кажа, што калі хтосьці хоча ісці за Ім, то павінен узяць свой крыж і следаваць за Ім», — звярнуў увагу арцыбіскуп Тадэвуш Кандрусевіч.

Мітрапаліт назваў сімвалічным тое, што асвячэнне новага касцёла адбываецца ва ўрачыстасць Перамянення Пана, бо «першаснае заданне Касцёла – духоўна перамяняць чалавека і весці яго шляхам збаўлення», а «маючы на ўвазе тое, што чалавек грэшны, уцякае ад жыццёвага крыжа, неабходна ўвесь час папраўляць яго жыццёвы шлях, каб ён адпавядаў Божаму плану».

Абраз Перамянення Пана ў галоўным алтары новага касцёла

Нагадваючы, што Перамяненне Пана стала «тым досведам, які рыхтаваў апосталаў да будучых выпрабаванняў», іерарх дадаў, што святая Імша – Эўхарыстыя – гэта «таксама перамяненне хлеба і віна ў Цела і Кроў Езуса»; «яна ўмацоўвае нашы духоўныя сілы і рыхтуе да пераадольвання цяжкасцяў».

Звяртаючыся да парафіян, арцыпастыр сказаў: «Дарагія вернікі Негарэлага, вы так доўга чакалі, каб мець свой касцёл, у якім будзе цэлебравацца Эўхарыстыя. Нарэшце ва ўзнёслай радасці вы можаце паўтарыць разам са св. Пятром: “Пане, як добра нам тут быць”. Сапраўды добра, бо тут у слове Божым, сакрамэнтах, перад усім у Эўхарыстыі, ёсць Хрыстус». Мітрапаліт дадаў, што «менавіта Хрыстус умацоўвае ў жыццёвых цяжкасцях, каб мы заўсёды маглі казаць, што нічога нас не аддзеліць ад Божай любові, якая стала бачнай у Езусе Хрысце, які жыве ў сваім Касцёле».

У парафіі Перамянення Пана ў Негарэлым працуюць айцы місіянеры Святой Сям'і. Пробашчам парафіі, якая ў гэтым годзе адзначае свой 10-гадовы юбілей, з'яўляецца а. Дзяніс Шастаковіч MSF.

Руплівы святар гуртуе вакол сябе руплівых парафіян, якія за вельмі хуткія тэрміны змаглі пабудаваць каталіцкую мясціну там, дзе яе ніколі не было. Іх руплівасць і еднасць праяўляліся і ў дзень асвячэння: спачатку ў прывітальных спевах, якія не змаўкалі, потым падчас літургіі. 

Кожную нядзелю ў святыні збіраеца больш за 50 вернікаў, якія актыўна ўдзельнічаюць у рэлігійным і касцёльным жыцці.

«У Негарэлым Бог жыве», — кажуць парафіяне, гэтыя словы паўтарыў і арцыбіскуп Тадэвуш Кандрусевіч напрыканцы Імшы. Мясцовыя вернікі разам з пробашчам — сапраўдныя сведкі гэтых слоў.

(AG), (AYU)

Фота Аксаны Ючкавіч