Ва ўсім свеце распаўсюджаны рух «Маці ў малітве». Дзейнічае ён і пры парафіях у Беларусі. Мэта руху — усведамленне кожнай маці свайго мацярынскага паклікання праз малітву, бязмежны давер да Бога і даручэнне дзіцяці Яго абароне. Бог жа ўмешваецца толькі тады, калі Яго просяць аб гэтым, і таму чакае мацярынскага заступніцтва за дзяцей.

«Маці ў малітве» рэгулярна збіраюцца пры парафіях на супольную малітву. Так у верасні сабраліся яны ў санктуарыі Маці Божай Валадаркі Азёраў у Браславе. У трохдзённай малітоўнай сустрэчы прынялі ўдзел маці з Браслава, Ліды, Мінска, а таксама з Калугі, Разані і Масквы. Сярод іх былі вернікі як каталіцкага веравызнання, так і праваслаўнага.

Тры дні прайшлі ў глыбокай супольнай малітве, разважаннях і размовах. Жанчыны дзяліліся сваім вопытам, сведчылі пра Божую дапамогу ў іх жыцці і жыцці іх сем’яў. Удзельнікі канферэнцыі азнаёміліся з шэрагам важных аспектаў адносна выхавання дзяцей і моладзі; разумення праблем людзей, якія знаходзяцца ў алкагольнай або наркатычнай залежнасці; усведамлення важнасці ўмацавання сям’і як адной з найбольш важных каштоўнасцяў хрысціянскага жыцця.

Удзельнікі канферэнцыі выказалі ўдзячнасць святарам, якія былі з імі на працягу гэтых дзён: кс. Адаму Квяткоўскаму SDS з Браслава, кс. Алегу Півавару з Лёзна, кс. Андрэю Бочару MS з Далёкіх, кс. Марэку Пасюту OFMCap з Докшыц. Малітва і духоўная падтрымка святароў былі асновай паспяховага правядзення канферэнцыі. Гасціннасць жа браслаўскіх жанчын дапамагла гасцям адчуваць сябе як дома і не мець ні ў чым патрэбы.

Пакідаючы гэты прыгожы беларускі куточак, жанчыны з Расіі, перапоўненыя ўражаннямі і ўзмоцненыя духоўна, запэўнівалі, што знайшлі там новых братоў і сясцёр у Хрысце.