Апоўначы 18 жніўня 2012 г. у браслаўскім санктуарыі Маці Божай Валадаркі Азёраў адбылася святая Імша з удзелам руху «Маці ў малітве». У літургіі ўдзельнічалі біскуп Віцебскі Уладзіслаў Блін, Апостальскі Візітатар для грэка-католікаў у Беларусі архімандрыт Сяргей Гаек, святары.

Імша адбывалася ў межах сёлетніх урачыстасцяў у браслаўскім санктуарыі, якія праводзяцца пад дэвізам «Марыя — Маці пакліканняў». Як было сказана на пачатку літургіі, яна цэлебруецца ў той інтэнцыі, каб кожны з прысутных на ёй вернікаў вярнуўся дадому, узмоцнены Божай ласкай.

Гамілію прамовіў кс. пралат Рышард Мрозюк з Германіі. Святар адзначыў, што вера не з'яўляецца прыватнай справай, але справай эўхарыстычнай супольнасці, і падзякаваў усім, хто на нашай зямлі захаваў веру і перадаў яе новаму пакаленню. 

Падчас Імшы гучала падзяка Богу за 10 гадоў існавання ў браслаўскай парафіі групы руху «Маці ў малітве». Дзякуючы Пану за гэты юбілей, прадстаўнікі парафіяльнай групы прынеслі да алтара сімвалічныя дары.

У дар была прынесена палаючая свечка — бо, падобна ёй, члены руху «Маці ў малітве» жадаюць асвятляць жыццё сваіх дзяцей і ўнукаў і саграваць іх духоўным цяплом. Быў прынесены статут групы — бо падобна як у ім змяшчаюцца правілы яе існавання, так у сэрцы членаў руху, як было адзначана, змяшчаецца падзяка Богу за нараджэнне сваіх дзяцей і ўнукаў. Прадстаўнікі парафіяльнай групы прынеслі таксама ружанец — прыладу для малітвы да Маці Божай, бо, як кожная маці клапоціцца пра сваіх дзяцей, так і Панна Марыя нястомна клапоціцца пра нас. У дар быў прынесены крыж — сімвал таго, што Хрыстус ахвяруе сябе свайму Айцу, каб мы самі сталі падобныя да Езуса. Да алтара прынеслі хлеб — нашу штодзённую ежу; «як Бог падчас Імшы перамяняе хлеб у сваё Цела, няхай пераменіць нашы сэрцы, абудзіць жаданне часцей сустракацца з Ім у Найсвяцейшым Сакрамэнце», — прагучала з вуснаў прадстаўнікоў руху. Прынеслі таксама віно і ваду, каб Бог, перамяняючы іх у сваю Кроў, перамяніў хваляванні і трывогі маці за дзяцей у радасць і супакой, і, як віно і вада аб'ядноўваюцца ў адзін напой, каб і Бог аб'яднаў падобным чынам сем'і руху. 

Пасля літургіі адбылася ружанцовая працэсія са свечкамі.

Анастасія Грышан