Старшыня епіскапату Аўстрыі кардынал Крыстаф Шонбарн падкрэсліў, што кардыналы-выбаршчыкі рыхтуюцца да канклаву праз адкрытыя размовы і супольную малітву. Шчырыя размовы іерархаў падчас агульных кангрэгацый, па словах арцыбіскупа Вены, напаўняюць яго вялікай верай у выбар, які будзе здзейснены.

Як адзначыў у размове з журналістамі аўстрыйскі іерарх, за 15 гадоў свайго кардынальскага служэння ён «рэдка сустракаўся з такой вялікай павагай, яснасцю, добрай воляй, адкрытасцю, шырокім позіркам на праблемы і даверам, які пабачыў у гэтыя дні». Кардынал Шонбарн дадаў, што ў час кангрэгацый сталі вельмі выразна бачны выклікі і знакі надзеі паўсюднага Касцёла. Іерарх нагадаў пра ўціск і пераслед католікаў у свеце, адсутнасць цікавасці да рэлігіі ў часы матэрыяльнага перасычэння.

«Хто як наступны Папа зможа вырашыць усе гэтыя праблемы, як чалавек веры, які абвяшчае Евангелле?» — такім пытаннем задаўся кардынал і падкрэсліў, што з сучаснымі выклікамі можна справіцца толькі тады, калі ўсведамляць, што ніхто ў Касцёле не нясе цяжару сам, што «Хрыстус — галава Касцёла, і Бог апярэджвае нас сваёй ласкай».

Арцыбіскуп Вены нагадаў, што ў гэтыя дні прысутных у Рыме кардыналаў падтрымлівае малітва не толькі вернікаў, але і Бэнэдыкта XVI.

(AG)