8 лістапада Святы Айцец Бэнэдыкт XVI прыняў удзельнікаў пленарнага пасяджэння Папскай акадэміі навук. Пасяджэнне праходзіла ў Ватыкане 5–7 лістапада і было прысвечана тэме «Складанасці і аналогіі ў навуцы: тэарэтычныя, метадалагічныя і эпістэмалагічныя аспекты».

Выбар тэмы пасяджэння быў не выпадковым: на працягу апошніх дзесяцігоддзяў былі зроблены шматлікія навуковыя адкрыцці ў розных галінах, але многіх навукоўцаў іх вынікі не задавальняюць, бо часта бываюць аднабаковымі і не знаходзяць пацвярджэння ў больш шырокай і складанай рэальнасці прыроды. У сувязі з гэтым падчас сустрэчы Папа звярнуў увагу на вялікія гарызонты, якія стаяць перад сучаснай навукай і патрабуюць узаемадзеяння паміж яе рознымі галінамі.

Паводле Святога Айца, міждысцыплінарны падыход паказвае, што «навука — гэта інтэлектуальныя светы, якія не адасоблены адно ад аднаго, а ўзаемазвязаны паміж сабой і накіраваны на вывучэнне прыроды як адзінай, зразумелай і гарманічнай рэальнасці ў яе несумненнай складанасці». Пантыфік нагадаў, што такое бачанне свету супадае з поглядамі хрысціянскай філасофіі і тэалогіі.

Як інфармуе Ватыканскае радыё, Бэнэдыкт XVI падкрэсліў, што сусвет не з’яўляецца хаосам і не ўзнік з яго, і менавіта гэта паступова адкрывае навука, вывучаючы заканамернасці і парадак прыроды. Па словах Святога Айца, гэта яшчэ раз пацвярджае, што для адкрыцця таямніцы чалавека і сусвету неабходны дыялог і супрацоўніцтва паміж навукай і верай.

(AG)